أضف الموضوع
الشاعر السيد سعيد الصافي الرميثي - 04/11/2013م - 4:36 م | عدد القراء: 2302
يحسين حبك غالي ...يا تاج راسي العالي
عالرمح راسك للشرف جان إشراع ...ما ردت روس الشيعه تنزل للقاع
و ماي الوجه غالي الثمن ما ينباع ...دمك هدر رادوا يضيع و ما ضاع
و كل قطره كوكب بالكرامه إتلالي ...يا تاج راسي العالي
مولاي لو ما إنت ما صرت آني ...و يحسين الله الخاطرك سواني
و الهالسبب إسمك إبطرف إلساني ...يالمانسيتك ما أظن تنساني
خلني إعله بالك يالتعيش إببالي ...يا تاج راسي العالي
حاشاك يالبيك أنتخي تتركني ...يالحبك إبشم الهوه إمشاركني
لو أنسه ذكرك الله ليباركني ...عنواني عندك عبد متملكني
حبك أخذ عقلي و ملك دلالي ...يا تاج راسي العالي
رغم الزمان و حكم ظرفه القاسي ...لكن الغيرك أبد ما أندق راسي
حبك فخر كل وكت يملي إحساسي ...يحسين يالذكرك يعطر أنفاسي
عاقد عليك إبكل وكت آمالي ...يا تاج راسي العالي
يالنصبتني ملك غيرك شحتاج ...منبرك عرشي و خدمتك أشرف تاج
ما تنطفي جمرة شعوري الوهاج ...حبك سفينه الما تهمها الأمواج
و إركبت بيها و يا خطر يدنى لي ...يا تاج راسي العالي
جدك إبناتج خدمتك بشّرني ...و ساعة مماتي إبجيتك خبّرني
و ما طول إنت بالقبر تحضرني ...يا قبر يتجاسر بعد يعصرني
ما عندي غيرك يحسين مولاي تدري إبحالي ...يا تاج راسي العالي |
|
