أضف الموضوع
الشاعر السيد سعيد الصافي الرميثي - 11/08/2014م - 11:35 م | عدد القراء: 9885
أمك إجيتك...يبني إشلقيتك...ثالث مسيه
دفنك أحضره ...و بقلبي جمره...آنا الزجيه
يوليدي جيت الكربله بهمومي أسعي
إيد إعله عيني اللي إنطفت إيد إعله ضلعي
و بطور الأم الفاقده دلالي ينعي
ينزل عله إخدودي جمر يحسين دمعي
لو ما عرفتك ...لمن وصلتك...يصعب عليه
دفنك أحضره ...و بقلبي جمره...آنا الزجيه
ما باقي من جسمك كتر سالم لقيته
شميت عطر المصطفه و بلهفه جيته
و الشوفتك مثل الغصن طولي حنيته
و إعليك يحسين الدمع من دم بجيته
يبني المصيبه...جثتك سليبه...فوق الوطيه
دفنك أحضره ...و بقلبي جمره...آنا الزجيه
ناحت ملائكة السمه يبني إعله وضعك
وياي إجت قبل الدفن رادت تشيعك
صوتك طلع من النحر تندبني أسمعك
و إتريد أدور عالأرض مقطوع إصبعك
جسمك تقّطع...من عنده شجمع...بثنين إيديه
دفنك أحضره ...و بقلبي جمره...آنا الزجيه
يوليدي أشم نحرك ردت و الصدري أضمك
إضلوعك شفتها إمكسره يوارث أمك
يحسين و بقلبي إجتمع همي إويَّ همك
خضّبت راسي إبلوعتي من فيض دمك
و إبنك أشوفه...جسمك يطوفه ...بالغاضريه
دفنك أحضره ...و بقلبي جمره...آنا الزجيه
لمن شفت شبلك علي قبرك يحفره
هذا العليل الوحّده و محتار بأمره
و اعليك يوليدي إنحنه و مكسور ظهره
من شافك إمقطع وصل ما حمل صبره
و إينادي صوته...جاوين إخوته ...أهل الحميه
دفنك أحضره ...و بقلبي جمره...آنا الزجيه
ناديته يبني يا علي آني الوديعه
والدك قلي ابيا كتر طايح رضيعه
دليني يوليدي بعد وين الشريعه
عباس أريد أتعنه لجفوفه القطيعه
يشهد وفاهن...يقطر دماهن ...أطيب سجيه
دفنك أحضره ...و بقلبي جمره...آنا الزجيه |
|
