» گرت عيون علي ابهاي المسيه  » نحبكم يا أهل بيت الرساله  » چا وين المهدي الننتظره  » موسی ابن جعفر گضه ابلوعة السم  » الكاظميه يعني راهب ما ينام  » الكاظم شال ابوه وگلبه مالوم  » یا دمعة عيني الهماله  » جعفر الصادق گضه ابسم الغدر  » يبو محمد عرفتك گاضي الحاجات  » الليله نزلت روسها العترة الأمجاد  

  
  • أضف الموضوع


  • الشاعر السيد عبدالخالق المحنّه - 04/11/2015م - 11:22 م | عدد القراء: 3774



    موقف     ايهد    الرواسي    ...مر     عليه
    حيرتي    من   فوق   مهري   ...ابلا   ايديه
    مدري أطيح اعله الوجه...مدري اعله ظهري
    و  آنه  كل  هذا  و  افكر...شنهو   عذري
    ســامــحــيـنـي...سـامـحـيـنـي

    خويه      من     قطعوا     يميني      عاتبتها
    ظلت      املزمه      ابقميصي       سامحتها
    من     أخذت    السيف    منها     ووقعتها
    و    إنزلت    من    نهري   مسرع    قابلتها
    ها    يا    إيدي    بيج    زينب   صافحتها
    بيج    أنا    دقيت    صدري   من    جبتها
    جن    تقلي    اوداعة   الله...امشي    قاتل
    بالعطاشه    هالله    الله...يا    بو     فاضل
    و   احملت   سيفي   بيساري   دمي   يجري
    و  آنه  كل  هذا  و  افكر...شنهو   عذري
    ســامــحــيـنـي...سـامـحـيـنـي

    قمت   أشوف   الجيش   غيمه   يمي  يقرب
    حاصروني   و   آنه   ضامي   قلبي    يلهب
    ابهالوضع    و   آنا   ذكرتج   خويه    زينب
    اتذكرت    مره    سألتي    و   جنه    نلعب
    قلتي    لو   واحد   ضربني   خويه   تغضب
    و   بوكتها   ازعلت   منج  و  الدمع   صب
    اتذكرت         هسه         سؤالج...يالحبيبه
    أسود          ايخلون          متنج...يالغريبه
    لو    طفت    نار   الخيم   شيطفي    جمري
    و  آنه  كل  هذا  و  افكر...شنهو   عذري
    ســامــحــيـنـي...سـامـحـيـنـي

    يختي    من   طاحت   يساري    استضعفوني
    سدوا        اعليه       طريقي        حيّروني
    اسهام    و    ارماح    و    بواتر     قطعّوني
    نمت    فوق    الجود   و   أبجي    شاهدوني
    قالوا      اعليمن      دموعك       ناشدوني
    من    قلت    أبجي   اعله   زينب    عذّبوني
    صوبوا   جودي   و   تبده...و  باوعت   لج
    و   آنا   بس   بعين   وحده...اتعذرت   لج
    عاينت   وشجم   سهم   نام  اعله   صدري
    و  آنه  كل  هذا  و  افكر...شنهو   عذري
    ســامــحــيـنـي...سـامـحـيـنـي

    أشعر    بفارس    إجاني    و    هذا    حالي
    قلي     انت     اتقول     آنا    الما     أبالي
    يالله      أدعوك      النزالي     و      القتالي
    قلت   له   لا   يمناي  عندي  و  لا   شمالي
    قلي    شنهو    الغالي   عندك   رد    سؤالي
    قلت    له   خدر   الفاطميه   اهوايه    غالي
    قلي    ما    يسلم    خدرها...بنت    أبوها
    بوقعتك   نكسر   ظهرها...و  ظهر   أخوها
    و    ابتسم   لمن   تحشمك   خويه   خدري
    و  آنه  كل  هذا  و  افكر...شنهو   عذري
    ســامــحــيـنـي...سـامـحـيـنـي

    بالعمد     لمن     ضربني     راسي      انطر
    يختي     جن    القاع    قامت    بيه     تفتر
    اهنا   صحت  يحسين  خويه  احضر   احضر
    راح   أروح   و   الك   الله   يا   بو   الأكبر
    وقعتي    خويه    اعله   وجهي   اتألم   أكثر
    ابعيني    سهم    العين   أسمعه   من   تكسر
    يا   مهر   خبّر   عضيدي...و  ابجي   حرقه
    قبل    لا    ينقص    وريدي...أرد    أشبقه
    آخر    أنفاسي   يضع   ثغره   اعله    ثغري
    و  آنه  كل  هذا  و  افكر...شنهو   عذري
    ســامــحــيـنـي...سـامـحـيـنـي

    بن    سعد    بالجيش    ناده    آنا     أسمعه
    هسه    ظل   حسين   وحده   خل    نقطعه
    حاولت    أنهض    و    أقلهم    بيَّ    فزعه
    بس    يزينب   هيه   قومه   و   هيه    وقعه
    ابلايه   شوف   و   لا   ايديه   بيش   أنفعه
    يا    الهي    رد   لي   سيفي   شوفي    رجعه
    ها       يملج      الموت       سارع...بالمنيه
    خاف    أشوف    حسين    واقع...عالوطيه
    خويه   زينب   من   يطيح  حسين   احذري
    و  آنه  كل  هذا  و  افكر...شنهو   عذري
    ســامــحــيـنـي...سـامـحـيـنـي

    حسين      ناداني     يخويه     وينك      انته
    و   اركضت   لاجن   يزينب   من    وصلته
    الشمر   جاثي   اعله   صدره   بعيني   شفته
    قلت   له   يا   ملعون   أذبحك   لو   لمسته
    خويه    جنه    ما   سمعني   و   حز    رقبته
    و   أشعر   اتجاهلت   ضربتي   من    ضربته
    خويه     ثاري    آنه    ميت...من     إجيته
    و     المهم    بسته    بوريده...و     بلحيته
    ميت    و    بأمرج   بقه   مشغول    فكري
    و  آنه  كل  هذا  و  افكر...شنهو   عذري
    ســامــحــيـنـي...سـامـحـيـنـي

    نار    المخيم    شفتها    و    شفتج    انتي
    و  آنه  جيت  أركض  و  أنادي  و ما سمعتي
    خايف     الوادم     تشوفج    لو     طلعتي
    من  قرب  لج  الشمر  قلت  له  اترك  اختي
    شفت   امن   السوط   طحتي   بس   وقفتي
    و    الشمر    من    شتّم    أمج   انهضمتي
    يذبح      اعتابج     يخويه...وداعة      أمج
    آنه   جسمي   اعله   الشريعه...روحي   يمج
    و   الله   يا  خويه  الدموعج  أفدي   عمري
    و  آنه  كل  هذا  و  افكر...شنهو   عذري
    ســامــحــيـنـي...سـامـحـيـنـي

    الشمر    من    صاح   بسمج   انتي   جيتي
    باوعي     السيفي     يقلج     يا      سبيتي
    هذا     دم     حسين    هذا    ما     دريتي
    شفتج     اتقبلين     سيفه     و      انحنيتي
    هوه   قصده   يشوف   دمعج   ما   رضيتي
    عفيه    أختي    درتي    وجهج   من    بجيتي
    قطّع   السوط   اعله  متنج...و  آنه   أنحب
    ابلا     جلد    متنج    لقيته...آه     يزينب
    متنج     اشسوه     ابدليلي    الله     يدري
    و  آنه  كل  هذا  و  افكر...شنهو   عذري
    ســامــحــيـنـي...سـامـحـيـنـي



    موقع القصائد الولائية © 2004 - 2013