ليلة العاشر ظلام...اموادع ابين الخيام
خيمة خيمة اتوادعن...قبل توديع الإمام
اموادع ابين الخيم ليلة العاشر سكون
خيمة خيمة اتقابلن ماظن العشره تهون
الله لا ينطي اليقول الخيمة ما عدها عيون
الفجر اعيون الحجر صاحب الكن فيكون
جانت الخيمة تشوف...كل تضاريس الطفوف
تسمع احساس الأرض...ردت اعليها السلام
خيمة الأكبر علي ينسمع منها دعاء
وقفت ابين الخيم بيها ريحت أنبياء
بيها قرآن انقره يوسف و شمة رداه
بيّن اخيال النبي و اعتله منها البكاء
و الخيم كلها تقول...طلعت أنوار الرسول
يا محمد نادته...تنذبح و الله حرام
خيمة القاسم فجر اتوضه من نهر العفاف
والدة و شاب و حلم حنه و اشموع و زفاف
خيمة متروسة دمع زهرة حلوه اعله الطفاف
باجر ايموت الورد من تهب ريح الجفاف
دارت اعليها الخباء...ودعت بدر السماء
تدري لو طر الصبح...ينخسف بدر التمام
خيمة ما إلها إسم جارت اعليها السنين
راح أسميها قلت خيمة الحب و الحنين
خيمة من دون الخيم بيها بس طفلة و جنين
من غفت يم المهد حلمت ابراس الحسين
محد اعليها يفوت...بس يمر بيها يموت
يا رقية لو هتف...بالسمه ايموت الحمام
خيمة صامت عالوفه فطرت بإسم الكفيل
ما غفه اعليها علم يحرس اخيام العليل
الخيمة من تخجل نهر تعرق اجفوف و نخيل
وقفت اقبال الخيم صارت ابهيئة سبيل
صاحت الزينب تعاي...و فاضت اعله الدنيه ماي
الغيرة من تهتز شرف...حاشه عالذلة تنام
خيمة حسين السبط البيها أسرار الوجود
اتوسطت بين الخيم تدري باجر ما يعود
مثل يعقوب و هله التمت اخيام الورود
طيحت كلمن عمه ...صارن ابوضع السجود
الخيم حست بالضياع...ركعت و سجدت وداع
باجر ابنار السبي...اتودع اوداع الختام
