الليلة وين تريد تدفن فاطمه...بالأرض يا با الحسن لو بالسمه
كل شي يتمنه يصير...قبر للضلع الكسير
صرخة من دار الإمام و ناعية اتهز الجبال...فاضت أنفاس الزجيه يا علي بسرعة تعال
اركض الدارك يحيدر مثل ركضك للنزال...اكسر اعيون المنيه رجع أنفاس الجمال
احجي عن كل مستحيل و كل أمر...فقط لتقول الضلع ما ينجبر
هذي خلها للأخير...قبر للضلع الكسير
الليلة وين تريد تدفن فاطمه
يا علي بحين افقدتها العرش أعلن مأتمه...هذا أول مره الكوثر ايحس ابضمه
كأنهم انجوم اعله كمره اتوادعوا وي فاطمه...ارفع الحسنين عنها بجوا أملاك السمه
يالتفكر بالدفن وضعك حزين...ايطمنك اعليها الوحي الأمين
لو ردت عرش القدير...قبر للضلع الكسير
الليلة وين تريد تدفن فاطمه
الهادي طعنوك برحيلك اليوم صاروا طعنتين...فاطمه هذي افقدتها لو محمد مرتين
بالصبر شد العزيمه الخاطر ادموع الحسين...هذا جثمان الوديعة وين ناوي اندفنه وين
وين ناوي الفاطمه تحفر لحد...و هاي ما صارت يدفنون الورد
ابحزن يتفاوح عبير...قبر للضلع الكسير
الليلة وين تريد تدفن فاطمه
بالأرض تدفن جسمها لجن حتماً يرتفع...النور لأصل النور يرجع فاطمه من الله فرع
اشحده ذاك اللي عصرها كسر من عدها ضلع...فتح جبهة اويه الجلاله لا يسره هالوضع
الهتك حرمتها ارتكب أكبر حرام...ما سمع الله عزيزٌ ذو انتقام
و يلعنه بنار السعير...قبر للضلع الكسير
الليلة وين تريد تدفن فاطمه
يسمع العالم ونينك يا علي و لجلك يون...تذكر الزهرة و ضلعها يكسر اضلوعك حزن
فاطمه بالدار قالوا و الرجس قلهم و إن...هيه جلمة و من حجاها للقيامة ينلعن
سقر حلفت و الله لو بيدي الخيار...ما عصرها الظالم بباب و جدار
يشهد الهذا الزفير...قبر للضلع الكسير
الليلة وين تريد تدفن فاطمه
ارجع الدار المصيبة لو دفنت الطاهرة...يا علي عندك يتيمه و تتنظر جيتك تره
انفض اغبار البدينك خاف زينب تنظره...طفلة لا تجرح قلبها قلها أمها امسافره
ما نوصيك اعله زينب يا رحيم...و انت أخبر يا علي بحال اليتيم
اعليك أمشّي يا أمير...قبر للضلع الكسير
الليلة وين تريد تدفن فاطمه
يا علي الله يعظم أجرك بهذا المصاب...غربة فقد اللي تحبهم يالعشت جم اغتراب
اتكترت ليث ابعرينك و الحكم بيد الذئاب...يشهد اعليهم محمد باجر بيوم الحساب
ايدك بإيده لون ما ترتفع...يا علي ما ينكسر هذا الضلع
انحفر من يوم الغدير...قبر للضلع الكسير
الليلة وين تريد تدفن فاطمه
