يمهدي عجل الله طلعتك...يمهدي أنتظر وي شيعتك
عايش المسمار يبني حسرة وسط احساسك
أمك آنا ابكسري تعرف حسرتي بأنفاسك
يبني ما يحتاج أسولف و انت تعرف ناسك
مختصر حزنك عذابي شيب راسي ابراسك
يقولون تجري من دم دمعتك...يمهدي أنتظر وي شيعتك
أمك آنا يا بو صالح تعلم بأخباري
ألف و أربعمية عام الهسه تسعر ناري
الهسه نابت يبني بعده بالصدر مسماري
امنيتي تحرق دار ذاك الحرق بابي و داري
أريدك تمحي كل العادتك...يمهدي أنتظر وي شيعتك
راح أبوية الناس كلها غيرت بالواقع
لعنة الله اعله الظلمني و عالرضه و عالتابع
علي أول كلها تدري اشلون يصبح رابع
امجتف ابين الشوارع غصب راح ايبايع
ابزمنهم احساب حسبوا جيتك...يمهدي أنتظر وي شيعتك
يبني و بساعة ظهورك كسر ضلعي اتجبره
محسن إبني الراح اترجعه أريد ابعشره
شرط من تبني مزاري ابلايه باب الحضره
خاف زينب تجي ازيارة و كل عذابي اتذكره
غريبة صعبة حالة عمتك...يمهدي أنتظر وي شيعتك
بعد جم جمعة التمرني و آنا أسأل وينك
و الثلثمية و عشر عالموعد امتانينك
ادخيل بختك يا بو صالح دير لأمك عينك
عالقبر محتاجة يبني تمسح ابجفينك
ابضريحي يمته اشوفن رايتك...يمهدي أنتظر وي شيعتك
اتقيم عاشور الزجية بيدك ارفع راية
كون من كل كتر تطلع للقبر مشاية
ابكل شبر مأتم أريد ابكل مساء اقرايه
اهواية زواري قليل كون فوق اهوايه
ابمزاري تجتمع كل صحبتك...يمهدي أنتظر وي شيعتك
