عتب يغفه عتب يصحه...أخوج و رحمي بجرحه...أنا العباس
أنّزل راسي من رمحه...أكاسر ليلج ابصبحه...أنا العباس
و إذا تردين...أجيج ألحين
دخيل الله اشكثر طيفي اعله جفنج هام...ردت نتلاقه لو ساعة برؤى و أحلام
الرغد شح و بقت عينج عله الأيتام...ليالي و سهرج امواصل مع الأيام
أدور عن فرد غفوة بجفن منضام...لقيت من التعب فرصة و أخيتي اتنام
إجه بحلمج أبو فاضل...دشوفيني قمر كامل...بجميع أعضاي
تراني امن العرش حاصل...لقب أعظم و أجل كافل...دريتي بهاي
لجل ترضين...أجيج ألحين
إجيت بليلة الوحشة بهدوء الليل...عتابج يفطر السبعة و يحد الحيل
شنهي اتقلي لي ما أدري بهجوم الخيل...و أنا روحي تفر يمج عله اليا ويل
اسمعي و أختصر حجي بلا تفصيل...قبل لا غفوتج تقضي بدموع اتسيل
و حق آية ألم نشرح...تره اعتابج ألم يجرح...يحز بالروح
إلج أسبابي تتوضح...عليمن جسمي بالمذبح...بقه مطروح
لو تعتبين...أجيج ألحين
إلج خل أختصر وضعي بأقل احروف...أسولف و انتي سمعيني و بعدها انشوف
جنت عالمشرعة امسيطر جنود الخوف...إذا بس لوحّت سيفي تطيح اسيوف
شفت عزيل إجه يمي بدمع مذروف...يقلي خالقك شاءك بلايه اجفوف
ملك عالي انحنه ابدربي...و تحتم ينقضي نحبي...الأمر لله
يحب ايدي يحن جنبي...استحيت استغفرت ربي...رحت وياه
شنو اتقولين...أجيج ألحين
القدر لو ما نزل أمره و إلهج راد...أبد ما ينحمل راسي عله الميّاد
أقص رجله الذي يقرب لبو السجاد...عمر بن سعد أدب راسه عله ابن ازياد
أصير آية بلسان الطف تظل تنعاد...ترتِل إنَّ عباساً لبالمِرصاد
شمر بوجودي خل يطلع...شنو يحرق أريد أسمع...يقول اخيام
لخلي بناره يتلفع...و أنا ابن الفارس الأنزع...أتركه اعظام
من اتأشرين...أجيج ألحين
رضيت بما كتب ربي و جرالي و صار...يزينب و الأمر يمج فلا أختار
نعم بالخوه والدنه علي الكرار...لجن انتي أمج الزهرة و إلج أسرار
إلج ويه السماء اشجم حديث و دار...و أنا تحت أمرج و انطر شنو الأقدار
إذا ردتي أعيد الطف...أجيج ابلايه جسم و جف...فقط هالراس
أخلي امن الرمح يلتف...رقاب أخنقها صف ابصف...أسد أنفاس
بلا جفين...أجيج ألحين
اعله ايدج يختي يا زينب أنا اتربيت...و أعرفج واجبة الطاعة من أهل البيت
الخلايق كلها صنعتكم و لا شكّيت...و أنا الخادم يمولاتي و إلج لبّيت
فقط رفعي القدر عني و أسمعج صيت...و مو أم البنين أمي إذا ما جيت
القدر خل يرتفع ساعة...أجي لج سمعاً و طاعة...أفزّع الموت
العدو و بحالة مرتاعة...قبر يحفر إله بقاعه...بعذابي يفوت
اعله رغم البين...أجيج ألحين
قبل لا يرتحل طيفي حزين ايروح...قبلما يغرق ابعبره ابدمع مسفوح
وداع و نتفق يختي كفاية اجروح...عتب ما ريد أريد أسمع يخي مسموح
دقومي و للسهر خلي الجفن مفتوح...يزينب فزي من نومج رقية اتنوح
عيونج خل ترد تسهر...عله أطفالي و عله الخدر...تباري اعيال
وعد مني يبت حيدر...حلم ثاني و بعد اكثر...الليالي اطوال
فده الهالعين...أجيج ألحين
