يبو الباقر يا حياة الدين يمشيد بناءه
حادق إبعرش ألله نورك وإجعله زينـة سماءه
* * *
يا من المعبود خصك سيد أرباب العباده
وبسجود الطاعه ماخذ أمر رسمي بالسياده
إبمدرسة جدك محمد دارس ومـاخذ شهاده
إو صرت للإسلام قائد رابع وناشر لواءه
* * *
يا من المعبود خيره إختـارك إو صفّه صفاتك
إبكربله ردت الشهاده وأجل الباري وفاتك
السبب شاف الدين موته إبموتك ويحيَ إبحياتك
طلب من ألله بقاءك حتى يتهنه إبقاءه
* * *
بيكم إتنظم الدين وثبتت أركانه القويه
ختم كل دين وتجله الذروة العليه العليه
باهه ألأديان إبّهاكم إو شعت أنواره البهيه
يا علي وإنتو بهاكم من سنه الباري وبهاءه
* * *
أقسم الباري إبجلاله وعزته وعلو إرتفاعه
للعباد إبلا ولايه منها ما يقبل إطاعه
الجحد بالدنيه رضاكم ما له بالمحشر شفـاعه
والذي يچسب رضاكم چسب من ألله رضاءه
* * *
والجحد عروة ولاكم شح من الرحمـه نصيبه
الصوچ مو منه ولاچن دنس ممزوج إبحليبه
مرض ساري من الرضاعه وعجز عن داءه طبيبه
والفته لو دُرّه صافي ثابت إبحبكم ولاءه
* * *
يا إلهي إشهد عليّه وأنته گصدي وإعتمادي
إجعل إبذچر أهل بيت الـ هادي درسي وإجتهادي
ولليواليهم موالي ولليعاديهم معادي
إو تكتب إبدفتر إعمالي إمن الغصب حگهم براءه
* * *
يكرم الباري لقاءه وللشرف والمجـد حـازه
وعن دخول الجنه ماله مانع وبيده إجازه
إمصدقه إمن ألله ورسوله وإبعلي صار إمتيازه
يبو الباقر والخدمكم هذا إكرامه وجزاءه
* * *
أنزل الباري إبكتابه چم وچم آيه فصيحه
تأمر الناس إبولاكم إو أهي إبمعناكم صريحه
وإنشرح صدر القراها من الوجل گلبه تريحه
والقراها إيكون يعمل بيها مو بس القراءه
* * *
الطالع إبوحي الجلاله وگصده يستسفر صوابه
يعمل إبمعناه حته يضاعف الباري ثوابه
منكم وبيكم وإلكم أنزل الباري كتابه
والكتاب إنختم بيكم وبفضلكم إبتداءه
* * *
المذنب إبيوم القيامه إيصير مثواه إبجهنم
ما تناشدني وتگلي إشلون من النـار يسلم
عوض حرگك يالموالي إبكربله حرگو إمخيم
عالعليل الگوم حرگو الخيمه
ويصد لعياله شتت بالهيمه
إمن السلب للگيد صار تسليمه
وإللي يبچي عله إمصابه يغسل إذنوبه بكاءه
* * *
يهالمذنب بالقيامه إبطوگ نار إيطوگونك
لو أبشرك بالنجاة من البچـه تعمي إعيـونك
سيد السجاد بالطف رگبته إتطوگت دونك
فوگ ذاك الطوگ دارو أمتونه
والعليل إشلون ما يرحمونه
راضي إبهالحال لو يخلونه
طبتـّه للشام صعبه وياه مسبيه نساءه
* * *
يهالمذنب بالقيامه إسياط نار إيلوعنك
لو أدليك إبنجاتك تنفجع ويهيج ونك
إبكربله إعيال إبو اليمه إرفعت ضرب السوط عنك
حمل ضرب السوط دونك السجاد
وبظهر هزله إمگيدينه إگياد
من عله الناگه ينتهض لو راد
ينضرب بالسوط حته يصير للمذنب رجاءه
* * *
يهالمذنب إلك وگفه بالحشر يندهش حالك
تـدري منهو إللي رفعـها عنك وحسّن أعمالك
وگفة السجاد هاذي الوگف بالمجلس بدالك
جامعه إبجيده وبحبل مچتوف
إتلوذ بكتاره إعياله من الخوف
إيناجي إبگلبه يا إلهي شوف
رادتي أجزي إبوگفتي لليواليني رجاءه
* * *
يهالمذنب إلك حيره عالصراط إشلون حيره
تدري منهو إللي رفعها عنك إو سهّل مسيره
لجلك إعيال أبو اليمه حارت وراحت يسيره
سيد السجاد حار بعياله
من يداريها ويرچب أطفاله
إتلوعت بسياط من الجماله
إبهاي باري الكون أمره إقتضه وراضين إبقضاءه
* * *