طاح ايمين أبو فاضل و الأيسر...خطف جوده ابحلگه و للخيم فر
إجاه السهم للگربه اوفراها * وگف يبكي او سكنه ما نساها
امواعدها على اميه الحشاها * او منها يستحي للخيم يعدر
سمع احسين حسه ركب و ارزم * فار اعلى الخيل طلعها امن الخيم
رديمه او شافه سابح ابدم * تخوصر فوگ راسه و الدمع خر
حط راسه يحضنه ابگلب مرتاع * شاله او تربه عباس بالگاع
رد احسين راسه ابگلب مرتاع * شاله اردود للتربان و الحر
يخوي العلم گلي وين اوديه * ينور العين دربي بيش اجديه
حنا فوگه او شمه و اشبك ايديه * او صاح احسين يخوي
يخوي انكسر ظهري و لا اگدر آگوم * صرت مركز يخوي الكل لهموم
يخوي استوحدوني بعدك الگوم * و لا واحد علي بعد ينغر
يخوي امنين إجتني هالرميه * يخوي السا وگع بيني عليه
يخوي السا عدوي شمت بيه * و شوفنك يبو فاضل امطبر
راد احسين شيله للصواوين * انتبه عباس لحسين و زرگ عين
يگله اشرادتك يا خوي يا احسين * يگله ريد أشيلنك و سدر
يخوي احسين خليني ابمچاني * يگله ليش يا زهرة زماني
يگله واعدت سكنه تراني * ابماي و أستحي منها امن اسدر
يخوي اشلون أشوفنها ابيا عين * لو جتني و قالت لي الوعد وين
دخليني أموت اهنا * يخوي المستحى من شيمة الحر
گام احسين يبچي للصواوين * ينشف دمعته عن النساوين
خاف لنهن ينفگدن على احسين * ويگلن له عليمن هالدمع خر
أويلي اتلگته تبچي اسكينه * تگله عمي العباس وينه
شرب ماي او نسانا ما نسانه * العطش و اگلوبنا تلهب امن الحر
خرت دمعة احسين او تنحب * او گال الها او نار الگلب تلهب
ابشاطي العلقمي عمچ امترب * قضى، فرت تصيح ألله أكبر
