قد قامت المجالس...بالأربعه الفوارس
و اتلاقت النوارس...يم بحر الأحزان

نتبارك بدمع الحزن لم البنين الأربعه...لو ما وفاهم ما حفظ للخوه واحد مرضعه
و انجوم طاحت عالأرض و القمر يم المشرعة...دخان من نار الخيم ثاير بخور الفاجعة
بالجنة أربعتهم...فاطمه استقبلتهم
من وصلوا الأشاوس...يم بحر الأحزان

مجلس حسين ابكل أرض أم الحسن بيه حاضره...وحدها لو رادت تجي المجلسه و تسمع منبره
لجن وفه الأم القمر أم البنين الصابره...المجلس العباس من إجت جابت اوياها حيدره
قالت له خل نوافي...هاي القلبها صافي
الزينب ابنها حارس...يم بحر الأحزان

أول طلب يوم الحشر من ربها تطلب فاطمه...لا ضلع لا طبرة علي لا نحر مهدور و دمه
جفين عباس بطبق شالتهن الرب السمه...عن يا ذنب يتقطعن فاطمه الربها اتكلمه
صح ما رضع لبنها...لاجنه قطعة منها
غالي بلا منافس...يم بحر الأحزان

لمن وصل ليها الخبر أم البنين و سمعته...فدوه الولد و أم الولد لحسين صوت الصاحته
يا زينب احجيلي الوضع بحسين من ناده أخوته...دافعوا عن سبط لو قصروا عن نصرته
قالت وحق كتابي...جانوا ستر حجابي
للخوه ما كو هاجس...يم بحر الأحزان

يشهد التل الزينبي من وقفت اعليه شاهده...قالت أبد ما قصروا هذا كلام السيده
يم البنين اتبشري كل خوف منهم ما بده...واحدهم ايطيع السبط جندي الأوامر قائده
كلما يمر ذكرهم...تشتهد بصبرهم
يا معدن النفائس...يم بحر الأحزان

سبحانه من خله البشر تحمل شعور الحملته...و اتزور عباس القمر لحسين كلما زارته
معصوم لا ما ينحسب لاجن نحس بعصمته...صورت محبته ابكل قلب لحسين تشبه صورته
هذا دليل و برهان...حبهم شريك القرآن
للتضحية مدارس...يم بحر الأحزان

هاي المجالس كل زمن منها العطش غِيرة ارتوه...كلما ظلام الطف رجع من نورها انشوف الضوه
من عدها نترجه الأمل من عدها نشتم الهوه...سبحان من خله الحزن و الفرحة ينجمعن سوه
فرحة نصر عظيمة...دمعة حزن كريمة
منها عرفها عابس...يم بحر الأحزان