نموت احنه...ولا محنه...عليك انشوف
إلك صحنه...بجوارحنه...بيديك اسيوف
لبو الأحرار...خدم و أنصار
خدم و أنصار...لبو الأحرار
بعنه أرواحنه و للموت شراية...و انضحي الدم لعيونك
و انطينه المحمد لجلك احجايه...منخيب بينه اظنونك
مجانين بهواك و نصرك الغاية...مو بس عابس مجنونك
و لا ردنه الفرات الما ضقت مايه...نعطش من ايعطشونك
يهون الدم...و لا نندم...إلك يحسين
نزيل الهم...لجل تسلم...ينور العين
و لا تحتار...خدم و أنصار
خدم و أنصار...يبو الأحرار
وحق راية علي الما طاحت بصفين...عدوانك نتحداها
ما يرجف قلب لأنصارك السبعين...ما دام الحق وياها
عدلين بمحبتك سيدي و ميتين...ربك بارك مسعاها
و الهذا السبب وياك مدفونين...يمك صاير مثواها
إلك فدوه...يمن تسوه...نزف اجروح
تظل قدوه...ولا تهوه...عداك الروح
فداك أعمار...خدم و أنصار
خدم و أنصار...يبو الأحرار
يوم الطف لزمنا لك شواربنه...عن شخصك ما نتخله
غير الله و محبتك كلشي ما عدنه...منها و هيهات الذله
السيف النصرتك يحسين شاهدنه...من غمدة السيف انسله
غيرك نرفض و ميصير قائدنه...كل العادانه انقله
يهيبتنه...يشمعتنه...يرفعت راس
يقدوتنه...و يرايتنه...بزند عباس
و لا تنهار...خدم و أنصار
خدم و أنصار...يبو الأحرار
فدوه أعمارنه العمرك يبو السجاد...و العاشق ينذر عمره
دين بغير شخصك أبد ما ينراد...يالنورك نور الزهره
بيك أسياد عشنه و خل نموت أسياد...أسياد بحب العترة
و لا نتبع يزيد و الظالم ابن ازياد...و الظالم منطيع أمره
نطيع أمرك...فده العمرك...عمرنه اوياك
يمن صبرك...كتب نصرك...عله العاداك
نصر ثوار...خدم و أنصار
خدم و أنصار...يبو الأحرار
واحد وصه الآخر لا تعوف حسين...يستاهل دم نفديله
الدين امحبته و بالموت احمي الدين...و الضحى لك ضحيله
هذا الواحد الما صار مثله اثنين...و يسمعك من تشكيله
تعبر عالصراط بغيره قلي امنين...لو ما دمعه تهديله
عطر دمه...يهب نسمه...عالوالاه
كتب اسمه...بسجل خدمه...اليوفي اوياه
مع الزوار...خدم و أنصار
خدم و أنصار...يبو الأحرار
إذا بالطف قدر عاشور يبعدنه...لا واعيونك منعوفك
بالكوثر غداً وياك موعدنه...نشرب ماي امن اجفوفك
باجر من تشوف الزهرة واحدنه...و اتقله انرد معروفك
نرفع روسنه و من ترد تنشدنه...يالشفت حسين انشوفك
عله الكوثر...يصب حيدر...بيدينه الماي
يجي و يحضر...علي المحشر...علي الوفاي
وفه الكرار...خدم و أنصار
خدم و أنصار...يبو الأحرار
