فوق وادي كربله قف يا فلك...عن حرم سيد الرسل أرد أسألك
يلطم اعله حسين أصبح كل ملك...مجلس و جبريل لن ناعيها

آنا ليث أهل الحجاز اسمي علي...ابن أبو طالب عله الأمة ولي
يا فلك لتدور لمن ينجلي...موقف الهالحرم من يحميها

يا فلك من واجبك بيه تحس...آنا للأمة جنت سيف و درس
يا فلك آنا اللي رجعت الشمس...و انت أول من تحسس بيها

من ضريحي وجهت آنا الخطاب...لعد كل أهل الأرض و أرجه الجواب
من قلب صادق تأثر بالمصاب...اشلون حال العايلة يرويها

سيدي يا بالحسن يا حيدره...اشلون أسولفلك على كل الجره
من يصدق بت علي متيسره...الناس تتفكر يحيدر ليها

مرة اعله الكوفه راووها العجب...قوم مجتمعة بفتنها و الغضب
جان كل ظنها يجازون التعب...اشكثر يا حيدر تعبت اعليها

الكوفة شافت وضع هاي العايله...الكوفة عرفتها حرم عقد الوله
للأسف للضعن لن نستقبله...بالشماته يا علي تاليها

العايلة بقصر الإمارة و تستجير...ما لقت يا حيدرة إلها نصير
اتقول سبحانه الصنع هذا المصير...بمجلسه ابن ازياد لن يوليها

من بعد قصر الإمارة بالأثر...لعد قصر ايزيد وداها الدهر
ايزيد لنه يشبح اعليها النظر...و باسمها الزينب ايسميها

اشلون ظل بجسد زينب بعد روح...و هية من مجلس لعد مجلس تروح
يا علي محتضنه هالليلة الجروح...اجروح من اليسر شيداويها

طلعت من الشام هالليلة بألم...اتوجهت يا حيدره لرض الخيم
عتب عدها اتوجه الراعي العلم...اشلون عنها يروح و يخليها