حيَّ على...أطهر جسد حيَّ على صبره
حيَّ على...نحره النطق قد قامت الثورة
حيَّ على...نوره...من يوم عاشوره...قد قامت الثورة
صوت الأذان من الرمح مو مأذنة اترفعه...راسه الشريف ايردده و العالم ايسمعه
أشهد بأن لن أنثني لن أتبع البدعه...و انفصل راسه من الجسد و اهتزت السبعه
سال دمه اعله الأرض سال...منها و سوه زلزال...ثورة الكل الأجيال
اسمه العظيم ابكل زمن مصدر شرارتها...و الحاربك بإسمه الظلم منصورة رايتها
رايتها منصوره...من يوم عاشوره...قد قامت الثورة
لاء الرفض صاحت نعم للباري و آياته...لولاها ما تمت أبد للرب عباداته
لاء الرفض أحيت فرض صومه و صلواته...و الهالسبب مطرة دمه الخالق سماواته
صاح صوت من العرش صاح...سبط أشرف بشر صاح...لجله اتهون الأرواح
لاء الحسين ابكل زمن يطلقها شريانه...لولاها ما ظلت أبد آيات قرآنه
صرختها مذكورة...من يوم عاشوره...قد قامت الثورة
ما جان أبد عند السبط ماي النهر غايه...عطشان لجن ما دنت نفسه و شرب مايه
غايته ايعلم كل بشر ما يرجع برايه...و ايموت لجل احجايته من ينطي الحجايه
راد لازم نعرف اشراد...نرفض ذل الأصفاد...نمشي بدرب الأمجاد
نتعلم يرد الفخر للرايد اينوله...ما يلزم احبال المجد بجفوف مشلوله
و أفعاله مأثورة...من يوم عاشوره...قد قامت الثورة
بإسمه الملائك سبحت للباري بالتوبه...وبحبه غفران الذنب للتكثر ذنوبه
سبعين حجه ازيارته للزاره محسوبه...بيبان ربك تنفتح من تنفتح بوبه
باب باب من العرش باب...للمتعني طلاب...اتحضره يوم الحساب
يتعنه لو صار الحشر للطاحت بشده...و يعود كل صاحب ذنب كلما ذنب عنده
و أتباعه مسروره...من يوم عاشوره...قد قامت الثورة
لحسين يرجع كل نصر بإيمانه و إحساسه...و الدين وي راسه ارتفع من ارتفع راسه
و القال داست عالصدر عالصدر ما داسه...لليوم ظلت رايته بجفين عباسه
جفين بالطف دني جفين...يرجف منهن البين...وفن عهد لحسين
ما داست اخيول الكفر شُبّه لهم مثله...حي ميت حسين الأبي ما يقبل الذله
للدين ناطوره...من يوم عاشوره...قد قامت الثورة
منهج فكر لهل الفكر يا منهج أفكاره...و الجنة تلقاها بدرب رجلين زواره
حسين الوحيد بكل زمن تتجدد أنصاره...ثار الإله و ما ترك رب العرش ثاره
ثار دمه ايطالب بثار...لا ما يقبل أعذار...منك سيد الأحرار
كل زمن واجب يالمحب ما تنسه ثاراته...و بجفك اتظل كل زمن مرفوعه راياته
يالقاصد اتزوره...من يوم عاشوره...قد قامت الثورة
