أقـارن لـك مـصـايـبـهـا وهـضـمـها..حزن زينب أشد لو حزن أمها
يـغـايـب تـدري بـيـها..شتجاوبني عليها...حزن زينب أشد لو حزن أمها
يـابـقـيـة ال غـالـب يـاحليف الثار...راح ابين لك نوايب تسلب الافكار
ابـتـدي ابـهجمة الغاصب من هجم عالدار...واختتمها بالكتايب والخيم والنار
مـصـيـبـه ابـتـدت بـالـزهـره المها...ومرار الدهر برض الطف ختمها
هـضـم فـاطمه وزينب..انشدك ياهو اصعب...حزن زينب اشد لو حزن امها
اتـصـوبت امك الزهره والضلع مهشوم...هالضلع جددواكسره بالطفوف القوم
نفس هالموقف تنظره ابجدك المظلوم...داست الخيل اعله صدره وجسمه يجري دموم
الـهـشـم ضـلـع امـك ابجوره وظلمها ...ابخيوله اضلوع ابو اليمه هشمها
مـصـابـيـن ابـحـزنهن...قلب زينب حملهن...حزن زينب اشد لو حزن امها
وفـاجـعـة مـحـسن بعيده تحير الاذهان...نفس هالموقف تعيده زمرة الطغيان
صـوبـوا عـبدالله جيده ابرمية الاحزان...باسهم قطعوا وريده وانذبح عطشان
مـصـيـبـه مـحـسـن اتـوضـح عـمـلها..هيه الرمت عبدالله ابسهمها
اجـت زيـنـب تـشـمه...وتناشد فيض دمه...حزن زينب اشد لو حزن امها
لـمـن اعـلـه الـزهره هجموا طغمة الظلام...فوق باب الدار شبوا مجمر الالام
وبـنـفـس هـالنار حرقوا بالطفوف اخيام...وابهجوم الخيل سحقوا عايله وايتام
حـرم مـن شـوفـة الـوالـي حـرمـهـا...ويـتـامـه هايمه ابلوعة يتمها
ابـهـضـم هـاي المصايب..اشتجاوبني ياغايب...حزن زينب اشد لو حزن امها
الـزهـره ماضلت وحدها يمها داحي الباب...عايش وياها سندها حيدر الينهاب
لـجـن زينب منهو عدها ابديرة الاجناب...لازلم توقف ابحدها ولابقت اصحاب
زلـم جـانـت اسـود بـحـد خـيـمـهـا..صـفت لاخيم عدها ولازلمها
تـصـب دمـعـة جـفنها..وانشدك عن حزنها...حزن زينب اشد لو حزن امها
لـو قـلـت جـتـفـوا حـيدر للسقيفه انقاد...هالوضع نفسه بالطفوف انعاد
بـالـحـبـل شدوا العسكر رقبه السجاد...باليسر غصبوه يحضر مجلس ابن زياد
رقـبـتـه امـن الـسـلاسـل يـجـري دمها..ودمعته جالمزن عالخد سجمها
عـلـيـل ودمعه يجري..واضن بس هوه يدري...حزن زينب اشد لو حزن امها
الـزهـره مـن قصدت عدوهاللحقوق تريد...بالحبل ماجتفوها ولاسرت بالبيد
زينب ابسوط اضربوها وشاجفت بالايد...ابطشت شافت راس اخوها بين ايد ايزيد
يـسـيـره وواجـفـه ابـمـجـلـس خصمها..ومصيبة عمتك قلبك كتمها
ابـجـمـر لـوعت مصابك..اريد اسمع جوابك...حزن زينب اشد لو حزن امها |
