مصرعك خيبني والدهر شيبني
آيبني آيبني
* * *
يبني يالأكبر مــــــــن ردت للحرب تمضي وتطلــع
ودعتك وصوتي انخــــــمد ما يحچي غــير المدمع
شلت ايدي للباري وصحت يا ربي گلــــبي اتصدع
يا رب مثل يوســــف ردت ضنوتي الأكــــبر يرجع
الباري حقق ظني فگدك يالمني
آيبني آيبني
* * *
بارينه حقـــق دعــــــــوتي وارجعــــت من ميدانك
شفتك بآمــــــــال النــــصر متوجـه لصيــــــــوانك
نار الحرب نار الحــــــــزن ما غــــــــيرّن ألوانــك
لا چن شفت جمر العطش يتناثر امـــــن السانــــــــك
هالجمر يلهبني عالبعد ذوبني
آيبني آيبني
* * *
آخر وداع اتـــوادعــــــــت ويايــــــــه واشتد همي
للحرب يبني مـــــــن رحت هدمـــت حيلي وعزمي
مرة يصور لــي الأمــــــــل ترجــــع واشوفك يمي
ومره يصورلـــــــي الحزن جسمك صريع ومرمي
هالأمل عذبني والحزن صوبني
آيبني آيبني
* * *
أنت ابغـــمار المعــــــــركة تتــــبارز اويه العسكر
وآنه حــــــــزينه ابخيـمتي منــــــــك خــــبر اتنطر
ما شفت لن فزعة زلـــــــم واسمعت صوت الخدر
صاحن يليله اشها لخـــــبر بالحومة طــــاح الأكبر
هالخبر دوهني والهظم صدعني
آيبني آيبني
* * *
يوليدي من صوب الحــرب للخيم شالوا جســــمك
اتعنيتك ابكســره گــــــــلب اجري المدامع يـــــمك
يم جسمك أحنــــيت الضلع وامزجت دمعي ودمـك
ناديتك بصـوت الهــــــــظم أمك ترانــــي أمــــــــك
منظرك يفجعني ابغربتي تضيعني
آيبني آيبني
* * *
يبني يا لأكبر مــــــن شفت جسمك صريــع اگبالي
روحي افرشتها لجثـــــــتك وغــــــطيتك ابــــدلالي
ناديتك ابچلـــمة حــــــــزن منهـــــــو اليأمن حالي
منهو اليصــــــــبر الوالــده التفــــگد ولدها الغالي
هالنحب أتعبني والصبر حاربني
آيبني آيبني
* * *
بضيعتك يبـني ضيعــــــــت كل سهر ليلي وتعـــبي
ريتك يســــــــباح الچـــــبد تسمع ونيني وعــــتبي
يا نظر عـيني المنفــــــــگد بيمن اوچد دربــــــــي
يوليدي وصفــــولي الصبر واشلون يصـــبر گلبي
يا شهم جاوبني بالطفوف اتذبني
آيبني آيبني
* * *
