أضف الموضوع
الشاعر واثق العيساوي - 15/09/2014م - 9:00 م | عدد القراء: 4147
سلطان المجد و العزه... معناك معناك
مشهد ما تصير الجنه ...لولاك لولاك
بإسمك شرفتها...و ما يوم اقصدتها...لولاك لولاك
يقولون الفرح لو دق عله الباب... يجيب إلنه الأماني
و أيام التمر ابين الأحباب... محسوبه بثواني
و أيام العشتها ...من عمري و شفتها
مو منه احسبتها...تمر طيف الأفراح
الفجر لمن أزورك ...يغسل وجهي نورك
فرح همي و سرورك...و لا أعيش بالجراح
كل خطوه ابضريحك جنّه... مولاي مولاي
أحس طعم العسل من صحنك... الماي الماي
دواي و أمنياتي...و لا معنه الحياتي...لولاك لولاك
إجيتك و اليجيك امفارق الناس... يا دنيه التلمه
أشمنك نفس بس غير الأنفاس... عطر الجنة أشمه
ابضريحك ليل أتاني ...ملاذي و بيه كياني
عفت دمعه بمكاني ...تناديك و تحاجيك
رساله و بيها اسمي ...أخطها و حبري دمي
كتبت اعليها همي ...و الهموم تبجيك
من أشكي ابضريحك أرفع ...الراس الراس
ترضه اشلون أعوفك و أشكي... للناس للناس
صعبه و انت موجود...درب الوفه مسدود...لولاك لولاك
أثر جدمك إذا ظل فوق التراب... يبو محمد كرامه
و نور بقبتك يا نسل الأطياب... للتايه علامه
ذهب في محتواها ...شمس تشرق ضواها
كل اللي إجاها...بالهموم و الدموع
بالهم قضّه عمره...و تعب من كثره صبره
الحسره اتّجوي صدره ...و الآهات بالضلوع
بحياتك و بمماتك تسمع... الآه الآه
و اليتعنه ليه إشلون... تنساه تنساه
مضيفك دومه مفتوح...و أبد متطيب الجروح...لولاك لولاك
إجيت و مولدك جن عالسمه ايدور ...ضواها الليالي
مو كل نور مثلك ينحسب نور... لا و الله يغالي
كل الكون فرحان...يردد إسمك آذان
يا وارث القرآن ...بالورود أهنيك
ليلة بفرحة العيد ...ويه الحب مواعيد
ابعين العالم إجديد ...بمولود فرح بيك
أبيات الفرح أقراها... آيات آيات
هيهات اليحبك ينسه... هيهات هيهات
إشلون المثلك أنساه...أعيش ابغربه و بآه...لولاك لولاك
أحاجي إجروحي ٌأقلها ها يالجروح... يمته الفرح يمته
تقلي للرضه و بمشهد الروح... دواهن شوفك إنته
الجنه اتطفي كل نار...يسر و شايل أسرار
أوصفك بيش محتار ...بمولودك شناديك
باجر يوم الحساب... أريدن منك اكتاب
تسجلني اويه الأحباب ...يمولاي أمل بيك
باجر عطرك اعله اهدومي ...يلقوه يلقوه
يعرفونك شفيعي و ذنبي ...يمحوه يمحوه
متخليني محتار...وحدي و أدخل النار...لولاك لولاك |
|
