أضف الموضوع
الشاعر ميرزا عادل أشكناني - 01/11/2014م - 10:48 م | عدد القراء: 8529
وقف عالمشرعه و بصوته ناداك
يعباس إنكسر ظهري اعله فرقاك
إجيت ابدمعي ...أنوح و أنعي
يهاشم ضلعي ...ابعمود اجبينك
صعب يحزامي...إذا جدامي
أشوفك دامي ...بلا جفينك
دليلي ابفقدك ...يذوب ببعدك
يظل من بعدك...وحيد احسينك
إجيتك فاقد ...يخويه و قاصد
أشيلن رايد...سهم من عينك
أريد ابجف أرد الجربه بمتونك
و أمسّح دمك الجامد عله اعيونك
و أشد بالرايه جرحك و أقطع إدماك
يعباس إنكسر ظهري اعله فرقاك
دقوم اويايه ...بيديك الرايه
نرد للثايه ... و نفرح أيتامك
أصيح ابحسره ...و أنوح ابعبره
عليك الزهره ...ترد لخيامك
لجن شيردك ...و أشوف الضدك
قطع لك زندك ...وقع صمصامك
تعفر جفك ...عدوك ايحفك
إجو من خلفك ...طبر لك هامه
يخويه من قبل لا تخمد أنفاسك
ابعمود ابحديد و هشموا راسك
يريت اليذبحك يذبحني وياك
يعباس إنكسر ظهري اعله فرقاك
يسور اعيالي ...اشتظن يالغالي
نبض دلالي ...يبطل اونينه
حرم و الخدر ...تظل تتنطر
اشعجب يتأخر ...الكفيل اعلينه
تظل بالمصرع ...طريح امقطع
و أنا من ارجع ...شقل لسكينه
يوفي اوعوده ...بذل مجهوده
وعدني ابجوده ...الوعد جا وينه
يخويه و الرضيع ابخيمته يريدك
ترد له بالعذب و اتشربه بأيدك
رقيه اتسكته و اتقله القمر جاك
يعباس إنكسر ظهري اعله فرقاك
يخويه و إختك ...جبتها ببختك
دقوم ابهمتك ...نسدر ليها
إذا ما تقنع ...تقوم و تفزع
تشوف المدمع ...دمه تبجيها
نظرها اتديره ...و تصيح ابحيره
يراعي الغيره ...منو اليحميها
عقب كافلها ...قطع محملها
خوله ايدلها ...و شمر يسبيها
عله الهزل تنادي و تندب الكافل
يبو فاضل سبو زينب يبو فاضل |
|
