أضف الموضوع
الشاعر السيد سعيد الصافي الرميثي - 05/11/2014م - 10:08 ص | عدد القراء: 4379
للفرح معلوقه شمعه ...و الحزن بعيوني دمعه
و الزمان ايصيح أسمعه ...روحتك ما بيها رجعه
يبني ما أصدق زماني ...منه تحصل ساعه فرحه
للغدر سيف ابيمينه ...للطعن باليسره رمحه
ساهرت ليله بعتابي ...ريته لا راواني صبحه
ما بعد ترهم له طيبه...ينزف بدلالي جرحه
امثلث السهم الرماني...يبني من قلبي اشيطلعه
لو ردت أصبر و أتاني...روحتك ما بيها رجعه
جا بعد عمري اشيلمه ...ماي و إتبده بيديه
يبني شمسه و ذكرياتك...هيجت كل حسره بيه
آنا و الغربه ووداعك...مثل المتاني المنيه
أقطع الظن و إنتظاري ...لو إلك يوليدي جيه
كلشي بالدنيه يغالي...لو رحت وياك أودعه
ما بعد ينفع سؤالي...روحتك ما بيها رجعه
حسبت شمعة شبابك ...يكبر بليلي ضواها
و بظلام الغربه يبني...دمعي الموادع طفاها
أمك الربت يجاسم...تنتظر ثمرة رباها
ليلة الحنه و زفافك...نصبت الحزنك عزاها
شلتك بين الجوانج...يا عزيزي اشهور تسعه
شنتظر يالعني رايح...روحتك ما بيها رجعه |
|
