أضف الموضوع
الشاعر السيد سعيد الصافي الرميثي - 17/11/2014م - 10:11 م | عدد القراء: 2590
رغم الأخطار...نمشي زوار
دقت قلبنه ...حسين
صرخة غضبنه... حسين
نمشي زوار
نعرض أروع صور عن درب الطفوف
خل جميع العالم إبعينه يشوف
عالمنايه إتسابقت صف الصفوف
قدمت ويه الذهب قطع الجفوف
منها قامت تستحي حته السيوف
و إعتنت لحسين ملهوفه تطوف
هذا برهان...يبقه عنوان
ثورة شعبنه ...حسين
صرخة غضبنه... حسين
نمشي زوار
سجّل التاريخ و إبطول الدهر
عن درايه من رسم هاي الصور
أربعين حسين كل عام إبصفر
و الدماء الزاكيه تترك أثر
و المرامه يرتقي الصرح الفخر
ما يهاب الموت يتحده الخطر
و إحنه أحفاد ...درب الأمجاد
غاية طلبنه ...حسين
صرخة غضبنه... حسين
نمشي زوار
ياللي تسأل ليش نتحده الصعاب
تقتنع من تستمع رد الجواب
للنجاة حسين أبو السجاد باب
و إعله كل خطوة جدم أجر و ثواب
تنحسب خطواتنه إبيوم الحساب
تنحسب كلما تمر ذرة تراب
عدنه محبوب...يمحي الذنوب
إنحبه و يحبنه ...حسين
صرخة غضبنه... حسين
نمشي زوار
ما يهمنه التعب و الدرب البعيد
لا نقر للظالم إقرار العبيد
لو شهيد إبمصرعه يتبع شهيد
إنريد نثبت لليتبعونه اليزيد
يبقه إلنه حسين هو أشرف نشيد
عله طول الزمن مطلبنه الوحيد
أروع أمثال...عبر الأجيال
شيعه و نسبنه ...حسين
صرخة غضبنه... حسين
نمشي زوار
صحنه نتحده الخطر و شما يصير
إتواصل الزوار لحسين المسير
حسين صرخة ثار و إتهز الضمير
يوم صاح إبكربله هل من نصير
صحنه أنصارك يبن أشرف أمير
هاي نعمه و فضل من الله كبير
صحنه وياك ...حاشه ننساك
شمعة دربنه ...حسين
صرخة غضبنه... حسين
نمشي زوار
إي و حق كل قطره من دم الذبيح
ما نعوف الثار ساعه و نستريح
خلهم يسمعون منطقنه الصريح
عهد عدنه و ما يصح إلا الصحيح
ألف لو كل يوم من عدنه يطيح
نبقه يحسين بضمايرنه نصيح
نرفع أصوات...ذله هيهات
قائد حربنه ...حسين
صرخة غضبنه... حسين
نمشي زوار |
|
