أضف الموضوع
الشاعر ميرزا عادل أشكناني - 29/11/2014م - 11:10 ص | عدد القراء: 33912
يالولد نام ...راح أقلك قصه عن الغاضريه
يالولد نام...يا عسه النومه يعبدالله هنيه
كان ما كان ...قصة أحزان ...بيها لوليلك يعبدالله و أكلمك
أدري عطشان ...و القصد جان ... تلتهي بالقصه حته أقدر أنومك
نام و بلكت الله يرحم حالك ابهاي ...و انت نايم تحلم إنك شارب الماي
يالولد حيف ...صرنه بالطيف
نندعي تشرب و لو قطرة اميّه
يالولد نام...يا عسه النومه يعبدالله هنيه
يبني معذور ...قلبك ايفور ...من اضماك و أدري ما تفهم كلامي
بعدك اصغير ...ستة اشهور ...اشلون أفهمك يبني راح اتموت ضامي
و الحرم صاحن تعالن خل نسكته
تبتسم له عمته و تضحك له إخته
ندري يرتاح ...ايبطل لصياح
لو نظر قامت تهز مهده رقيه
يالولد نام...يا عسه النومه يعبدالله هنيه
عفيه صبري ... و الله يدري ...اشقد صعب عالأم إذا يبجي ضناها
من تشوفه ...دمعه يجري ... مستعده اتموت بس تضحك شفاها
و آنا إبني ابيا وضع من بعده أبقه
وجهه أصفر أنظره و اشفافه زرقه
مره أنعي ...و أجري دمعي
و مره أدعي الله يلعن آل اميّه
يالولد نام...يا عسه النومه يعبدالله هنيه
يا سنه الروح ...منك اتفوح ...ريحة الزهره و أشم منك عطرها
و العجب حين ...بالضمه اتروح ...و الفرات الجدتك ندري مهرها
اتموت ضامي يبني وي باقي اليتامه
و جدكم الساقي علي ابيوم القيامه
هذا محسوم ...و عدنه معلوم
تنذبح لنك نسل حامي الحميه
يالولد نام...يا عسه النومه يعبدالله هنيه
وسفه تالي ...هذا حالي ...أنظر إبني و للنهر مشبوحه عينه
و بسؤاله ...و هم سؤالي ...وينه عباس اشعجب طوّل علينه
ما أظن عمي القمر ينساني حاشه
و اهوه صار بكربله ساقي العطاشه
مني يسأل ... شو تعطل
اشلون أقله يبني عمك ماله جيه
يالولد نام...يا عسه النومه يعبدالله هنيه |
|
