أضف الموضوع
الشاعر واثق العيساوي - 02/06/2015م - 6:44 م | عدد القراء: 8568
مشتاقلك يالمبتعد ...مشتاقلك يمته ترد
يومية عيني اعله الدرب...و اتدّورك ابين الغرب
تسأل ترد لو ما ترد ...مشتاقلك
شمع عمري ... على وجه النهر وديته الك تدري
و جرف صبري ... جمع كل الرسايل و الصبر عذري
إلك أمري ... يسولفلك عذابي و حسرتي و جمري
يسر صدري ...يشمس الما تمر و تعتني الفجري
ناديتلك ارجع إلي ...ناديتلك يا بن علي
مشتاق لك قد النبض ...و كل بقعه من هاي الأرض
تسأل ترد لو ما ترد ...مشتاقلك
يلوموني ... يشوفون الصبر بيه و يلوموني
و يتهموني ... بسرابك يالغبت ضايع يتهموني
تره اعيوني ... أبد ماترتوي ابغيرك تره اعيوني
ينسوني ...كل ظنهم إذا تبعد ينسوني
أحتاج لك ماي و هوه ...أحتاج لك قمره و ضوه
شيصبره قلبي المفترق ...أنفاسك الما تختنق
تسأل ترد لو ما ترد ...مشتاقلك
يهالغالي ... يمهدي الأمه انتظر يهالغالي
يظل عالي ... لواك ابجفك يرفرف يظل عالي
أنا آمالي ... اغسل وجهي من نورك أنا آمالي
تجي إقبالي ...و لا أصدق إذا أشوفك تجي إقبالي
أدعيلك ويه الفجر ...أدعيلك بلكت تمر
معذور و أدري اشعطلك ...حنّت شوارعنه إلك
تسأل ترد لو ما ترد ...مشتاقلك
أنا امتاني ... أشوفك يا حلم عمري أنا امتاني
متنساني ... أدري اشما غبت عني متنساني
بقه إلساني ... دعاء الندبة يقرالك بقه الساني
أظل آني ...عله ادروبك دمع شمعه أظل آني
وديتلك دمعة عتب ...وديتلك قلبي التعب
بجفوفك امتاني الصبح ...حته الدموع التنمسح
تسأل ترد لو ما ترد ...مشتاقلك |
|
