أضف الموضوع
الشاعر مهدي بارون - 26/10/2015م - 11:55 م | عدد القراء: 18523
يبعد وطنهم...يقرب مماتي
ظل عندي منهم...بس ذكرياتي
و بعالم الأحلام...جرح البعد يلتام
ظلت من الأيام...بس ذكرياتي
يمه جيتج...ما لقيتج...زينب آنه من بعد رحلة عذاب الغاضريه
أمشي جمره...و أجري عبره...ذكرياتي يمج أحجيها و أزيد الهم عليه
أدخل دار ماجن هيه داري...و الخله الدمع من عيني جاري
حضنج ما أشوفه بانتظاري...اخلاف حضنج أرتمي فوق الوطيه
و بداري محد يتلقه همي...يا بت محمد مو انتي أمي
أروي لج الآلام...جرح البعد يلتام
ظلت من الأيام...بس ذكرياتي
من رحلنه... ويه هلنه... تالي أرجع مو أهل وياي رجعّت المآسي
و اعله حالي... هالليالي... سوده صارت بس بقه الأبيض ييمه شيب راسي
أرجع بس جبت ويّايه ذكره...من حسين جبت اضلوع صدره
خليهن ابصدرج يشفه كسره ...لا يظل كسرج يهد حيل الرواسي
ظل صدره حاير بيش ايتألم ...من الحوافر صار ايتهشم
لو من جثير اسهام...جرح البعد يلتام
ظلت من الأيام...بس ذكرياتي
يخفه صوتي ...و بسكوتي ...أجري دمعه و الوادايع عندي ظلن يالوديعه
و بجفوفي... قومي شوفي ...من أخويه جبت ويايه مهد جان الرضيعه
عالعتبه طفل طايح حجولي...يا يمه الطفل جاوينه قولي
أريده بالمهد يغفه و ألولي...يمه محسن بلكت ايهون الفجيعه
بعيوني حارت دمعة بجاهم...و العتبه صارت منبع دماهم
صار الدمع سجام...جرح البعد يلتام
ظلت من الأيام...بس ذكرياتي
يالزجيه... عالأذيه... بيه ظلت بالقلب حسرة ألم من فارقوني
عندي آنه... هالأمانه... هذا بيدي نفسه قيد المرتضه بيه قيدوني
بعد للمرتضه عندي علامه...أبعث له جرح ينزف ملامه
و يحجيله عتب دمع اليتامه...يمه من هذا عتبهم ألموني
أصبر و أتاني بعد الحبايب...لاجن زماني زاد المصايب
ما ظن عله الأيتام...جرح البعد يلتام
ظلت من الأيام...بس ذكرياتي
و النهايه ...امن البدايه... وسفه يمه جنها عينج من أثر سطرتها حمره
و الهضمني... هذا مني... ذكره صعبه هاج عين الكافل امن السهم جمره
و الخلاني أتنطر مماتي...و لا توصل لهلحظه حياتي
جبت لج نار لسّاها بعباتي...فاطمه الهذا الجمر ما تكفي عبره |
|
