راهب الدمعه و النوح...يا أمير الحزن روح
كافي تتحمل اجروح
يا مليك الآه حزنك يحوي مضمون
الما يفهمون الدمع خلهم يلومون
المثلك الشايف مآسي يصبر اشلون
حقك اتموت و دمعتك بين العيون
ابجي يا زين العباد...و امزج الدمعة بالزاد
بالحزن ذوّب الروح...كافي تتحمل اجروح
عالم أحزانك خلق صوت المنابر
أسست من دمعتك دولة شعائر
يالنظرت اليوسفك بين الحوافر
ابجي يا يعقوب خل تعمه النواظر
شايل اجروح الأيتام...ابثوبك اتطفي الخيام
والدك شفته مذبوح...كافي تتحمل اجروح
يالردت من والدك ذكره حزينه
بس قميصه و حته لو خاتم يمينه
شاهدت حته رداءه امسلبينه
سلبوا الخاتم و اصبعه قاطعينه
عالرمح راسه مرفوع...عالثره امطشره اضلوع
للسبي لازم اتروح...كافي تتحمل اجروح
من شفت نوق السبايه قلبك اشقال
عاتبت عباس عمك و الدمع سال
عمتي منهو اليركبها اعله الجمال
و الله صعبه تنجتف زينب بالحبال
ابغربتك صوتك ايصيح...خوفي لا زينب اتطيح
و العرش يبجي و اللوح...كافي تتحمل اجروح
عذّبك صوت الرباب اللي تسمعه
عالهزل ساعه تلولي و ساعه تنعه
اتنادي عبدالله طفل يصعب أودعه
خوفي يلجم منحره الرمح اليرفعه
عالحرم انت مسؤول...و السبي قصته اتطول
دمعك الغالي مسفوح...كافي تتحمل اجروح
شحجي و أذكر يا جرح و اجروحك اهواي
تبقه تتحسر إذا تنظر عله الماي
بس عذابات و ألم عمرك يمولاي
موت و اخلص سيدي من دنيتك هاي
لابس اهدومك السود...بيك آثار القيود
ابقبرك انسمعك اتنوح...كافي تتحمل اجروح
يا شبه موسه و نحيبك مصحفك جان
تتكأ عالعصه و اتهش بيها الأحزان
لو شئت ترمي عصاك اتصير نهران
تنقلب ماي و تروي النحره عطشان
علتك علت أيوب...اشما وكت الغروب
كربله ابعينك اتلوح...كافي تتحمل اجروح
