هذي زينب...و المجتبه اعليها خوفه
هذي زينب...ضم الطشت لا تشوفه
اتقله ابهالرزيه...لا تخفي عليه
بالحزن أروي رواية صدعت قلب الحجر
المجتبه يلفظ جبدته حيث بالسم انغذر
لن سمع صوت العقيلة رادت الخيها اتحضر
ناده ضموا الطشت عنها حته لتحس ابخطر
يضحك إلها...و يكابر و هذا حاله
يضحك إلها...عن لا تعرف الجراله
و نظرتها الشجيه...لا تخفي عليه
اتقله لا تخفي عليه يا جرح شفته ابتسم
بسمتك أدري وراها تخفي أوجاع و ألم
الطشت ليهمك تضمه ناسي يا خويه الأهم
اشفافك ابعيني شفتها هيه حمره و كلها دم
ها يخويه...ليش أنظرك وجهك أصفر
ها يخويه...طمن دليلي التحير
اعليك الله و نبيه...لا تخفي عليه
تبجي و اتقله يخويه امنين أجيب إلكم صبر
وحدة عني اتضم ضلعها تالي أدري منكسر
وواحد يضم جرح راسه لن أشوفه منطبر
النوب هم طشتك تضمه ألقه جبدك منفطر
الله يستر...لتقلي هاليوم أفقدك
الله يستر...جم لوعه تنطرني بعدك
الدنيه اشعدها ليه...لا تخفي عليه
عن جميل الصبر أسمع وينه بمصايب هلي
الدنيه تخطف من حياتي ولي من عقبه ولي
و انت من تبعد عليه كربله اتقرب إلي
كأني أسمعها تنادي عالوعد يا بت علي
أندعيلك...تشفه و أبارح همومك
أندعيلك...بشرني مو هذا يومك
لو هاي المنيه...لا تخفي عليه
غصبن اعليه أصابر و المصاب أتحمله
لازم أتهيأ يخويه و أستعد الكربله
اشفافك الحمرة عقبها اشفاف أخوك الذابله
ايزيد يضرب ثغر يا ما جدنه جان ايقبله
أرد أسألك...جن قربت هالمصايب
أرد أسألك...ها يالحسن ما تجاوب
عن الغاضريه...لا تخفي عليه
عفية صبري اشقد حملني عفية ما جف الدمع
لا تضم الطشت عني خل أشوفك و أنفجع
يمكن ايهيأ دليلي يسهل العليه الوضع
طشت أصعب ينتظرني راس أخويه المنقطع
افجعني أكثر...أدري الطلب بيه غرابه
افجعني أكثر...خل أستعد للخرابه
اهناك أفقد رقيه...لا تخفي عليه
يالخفت لا يعله وني الطشت ما ردت أنظره
وينه خوفك من أريده لو بقيت امحيره
اهناك أنا بحاجة وجودك يالعفتني امخدره
عقب الحسين و كفيلي تدري أمشي اميسره
اشقد جبيره...حسين و حسن هاي اختهم
اشقد جبيره...شمر و زجر رافقتهم
اشلون أطلع سبيه...لا تخفي عليه
