وجه الحمد و البسمله...انت يالحسن
أول حسيني ابكربله...انت يالحسن
يالاسمك ابوجه الدهر كاتب حروفه
و حسينك بيوم الشدد لا ما تعوفه
ما حاضر و حاضر جنت بساحة طفوفه
جاسم يمثلك بالحرب و الكل تشوفه
روحك تطوف القافله...انت يالحسن
أول حسيني ابكربله...انت يالحسن
يالصالحتهم بالاسم صمتك قضية
ابهالخطوة انت الأسست للغاضرية
ما كو مثل يومك صحت يبن الزجية
هذا الكلام الكربله أصبح هوية
يا آية العز و العله...انت يالحسن
أول حسيني ابكربله...انت يالحسن
جاسم توصيه بالمهد كلمة ضميرك
يوليدي أريد ابكربله اتابع مسيرك
ما كو ابهالزمن و حسين أميرك
يا جاسم ابقبري و ردت أشتم عبيرك
درب الشهادة اتواصله...انت يالحسن
أول حسيني ابكربله...انت يالحسن
و الرمله وصيت و قلت كل جلمه آيه
يا رمله روحي ابمحملج الطف المنايه
خل تنسبين ابكربله ويه السبايه
وي زينب ابدرب اليسر شوفي الرزايه
اتوصي و دموعك هامله...انت يالحسن
أول حسيني ابكربله...انت يالحسن
يحسين أريدك تصبر الهاي المصيبه
واعليه قلبك خل يكف نوحه و نحيبه
جني أشوف عالترب جثتك خضيبه
زينب بعد عينك تظل بالطف غريبه
تبجي اعله حال العايله...انت يالحسن
أول حسيني ابكربله...انت يالحسن
يومك يظل يالمجتبه أعظم فجيعه
و اللي مرد جبدك مرد جبد الشريعه
نعشك يصيبونه ابسهم أهل الخديعه
ما تندفن يم النبي يبن الوديعه
حزنك منو اليتحمله...انت يالحسن
