ليث الحرايب...حيدر

سر العجايب...حيدر

بالنص نزل تعيينه...بعد النبي والينه

يوم الغدير الواقعة خل يسمع المو داري

جبريل عالهادي نزل بلغه بأمر الباري

حيدر علي بعدك ولي ودعته كل أسراري

حبه ثوابي...حيدر

بغضه عقابي...حيدر

و احنه بمحبته انجينه...بعد النبي والينه

آية التبليغ الوحي و باسم الجليل اينادي

اليوم أكملتُ لكم دينكم يا عبادي

و بعلي تمت نعمتي اهوه الولي البادي

نصبته أول...حيدر

من عندكم أفضل...حيدر

و المثل حيدر وينه...بعد النبي والينه

و المصطفه صاح الذي يتبع نهجي و ديني

يوالي علي قول و فعل لو رايد ايواليني

و اللي يعادي المرتضه يبغضني و يعاديني

و الواله بعدي...حيدر

ما خان عهدي...حيدر

بيه ربنه كمّل دينه...بعد النبي والينه

عبّرنه عن حبنه العلي و قال اليضدنه انغالي

و أسلافه جم واحد شهد عن الصميدة الوالي

قالوا له بخٍ يا علي هذا المقام العالي

تاج الزعامة...حيدر

ناله بكرامة...حيدر

سيف العدل بيمينه...بعد النبي والينه

الله و رسوله المصطفه بحب حيدرة وصانه

صارت محبته اويه الدمه تسري بجميع أعضانه

بالشدة دنيه و آخره احنه العلي منوانه

حاضر الشدة...حيدر 

ندخل بسده...حيدر

حامي الحمه يحمينه...بعد النبي والينه

كل شيعي لو صار الحشر حيدر إمامه يحضره

و اعله الصراط يعّبره سامح و فاتح صدره

يخسر الما بايع علي للجنة منهو ايعّبره

و الجنة بيده...حيدر

فاز اليريده...حيدر

يا ويل المعادينه...بعد النبي والينه

خالق القدرة ابرحمته ابحبي العلي بشّرني

مطمئن أنزل للقبر حيدر علي يحضرني

يا أرض بوجود الوصي تقدر بعد تعصرني

ساعة حسابي...حيدر

هوه كتابي...حيدر

و البايعه اتقره عينه...بعد النبي والينه