هذا عمر الورد ينقطع بالهوه...إبني طبع الشمع انخلق للضوه
أعلم أحضر زفته...ويلي طفوا شمعته
غمضت عينك يالولد لا تظن أمك اتنام...ضحكتك زفة امدلـله و آنه أنثر لك أحلام
شيبت و أنطر هالعرش يالولد أحسب أيام...هدّمت بيتي من رحت حنتك صارت أوهام
ليش ما ترد...ليش تبتعد
من أشوف العرس يالولد أنجرح...من تموت الشمس ما تجي يا صبح
إبني بالدم حنته...ويلي طفوا شمعته
لو غبت أنطر للصبح جيتك بالسلامه...مهجتي ترغب شوفتك انت طبع الحمامه
من يمر حاسد أرتعب انت كلك وسامه...بالحرب إبني بالحرب خل تزفه عمامه
وين يا ورد...وين لا تصد
ما أريد العمر بالدمع و الحزن...ما يعيش الصبر من يموت الابن
و الله تقتل غيبته...ويلي طفوا شمعته
ما غفت عينه أعتقد إبني يسأل عليه...بيه طبع جاسم من زغر إلا يغفه اعله إيديه
كل صبح بوسه ابجبهته و أنتعش للمسيه...لا قضه صله لا سهو إبني نفسه أبيه
جان مهجتي...جان دنيتي
من يصير المسه يبتدي بالدعه...رتل بمصفحه سورة الواقعه
جانت حلوه شوفته...ويلي طفوا شمعته
من أجي يوقف يستعد يلزم إيدي يحبها...ما عله صوته ابحضرتي إبني قمة أدبها
ما طلب مني أي طلب بس دعوتي طُلبها...يندعي دومه يندعي كون أجازي تعبها
دوم يلتزم...دوم يبتسم
إبني جاسم أبد ما كسر كلمتي ...كل صفاته ملك بس يحب خدمتي
وسفه بالدم حنته...ويلي طفوا شمعته
ما تصد عينه عالنسه ما تغره حلاته...مو مثل غيره يفتخر من كثر سيئاته
لو نظر حرمه بالدرب يخفي عينه ابصلاته...عادت اليهتك له ستر صعبة يستر خواته
شوف و افتهم...شوف و احترم
انت لو صح محب إلتزم و اعترف...قاسمك مدرسة ما يحب منحرف
افهم درسه و غايته...ويلي طفوا شمعته
لو نظر جاره بيه خلل ما يشمره بحجاره...حته لو بابه ينكسر إبني يوقف ستاره
بالفعل إخته جارته و إخته تحفظ وقاره...حته لو يغلط صاحبه هوه يبدي اعتذاره
غاب هالبدر...غاب بالقبر
ابني لجل الشرف ما بخل بالنحر...راسي بيه يرتفع و أفتخر عالبشر
ويلي قطعوا رقبته...ويلي طفوا شمعته
التزم بر الوالدة حته ربك يرفعك...لو زعل قلب أمك تره و الله محد ينفعك
ما ردت تلطم بالعزه و انت ذنبك يتبعك...لو متت و انت ملتزم ابني جاسم يشيعك
موت عالخدر...موت و افتخر
يا شباب أنصحك للهوه لا تذل...ترمي جاسم سهم ياولد من تزل
عمره رافع هامته...ويلي طفوا شمعته
لا تظن تكبر بالنظر من يقل كبرياءك...لا تظن يحترمك بشر من تقلل حياءك
افتخر حيدر سيدك لا تضيع ولاءك...و افتخر عندك كربله هيبتك كربلاءك
تاج كربله...تاج عالمله
يا شباب انتبه كربله اتشرفك...هذي زينب تره تنتظر موقفك
إلكم صاحت عمته...ويلي طفوا شمعته
