ما أشوف ابعيني...أنظر من اعيونك
ما أسلم روحي...لو أكو ايشبهونك
آنا لو ما عاقل...ما صرت مجنونك
كبّر بمحراب ثغرك سيدي الحب و البراعة...هالله هالله
كلشي يتنفس سجد لك خايف و يطلب شفاعة...كلشي صله
و الفروض الخمسة صلت مدري مفرد لو جماعة...يعلم الله
صلّت اويه أيتامك...بازدحام اسهامك
اختنقت التكبيرة...من دخان اخيامك
و الليالي العشرة...سجدت اعله اجفونك
صلت اعليك النوارس لمن اتلجلج صبحها...من المسية
راحت اتقعد اليتامة النامت و شبقت جرحها...ابلا عشية
و النوراس عدها مذهب بالصلاه سبلت جنحها...رافضية
شافن اختك زينب...صلّت ابلا خيمة
جمعن أسرابهن...شكلن بيه غيمة
حته طير النورس...ما يعيش ابدونك
و السهم صلّه وقوفاً يدري من يسجد يألمك...و اعتذرلك
و الهوى جم مرة حاول يوصل بنحرك يشمك...من سجدلك
لكن التربة غيورة تمنع الريح و تضمك...ما وصلك
و الهوى ابلا واهس...من قطعت أنفاسك
من يمر بزينب...يلتفت يم راسك
انت عطر الجنة...كلهم ايشمونك
الفروض الخمسة صلّن بس صلاة الليل حيرة...اعله السبية
مملكة أيتام جانت و الصلاه خلف الأميرة...زينبية
الصلاه جانت أسيرة حته قاع الله أسيرة...هم سبية
من تكّبر زينب...تنجرح تكبيرة
من تشيل اجفوفها...الله يمطر غيرة
جلمه بين اعيونها...يالعزيز اشلونك
العلقمي خجلان صلّه وضّه وجهه بمستحاته...عميه عينه
و الصلاه بس سجدة وحده مات من خلصت صلاته...وينه وينه
و اندفن أسفل ضريحك ما بقت بس ذكرياته...امعاقبينه
يبقه بحرك صافي...هوه تحتك ضامي
قول له اعرف قدرك...انت تحت أجدامي
لو أريد أوصلك...فنهم ايمنعوني
الرمال الحمرة جانت حمرة بس ابلا كرامة...وحشة ظلها
من نزل دمك عليها فرحت ابلايه ابتسامة...من خجلها
و الفرح احساسه مرهف يشبه احساس الحمامة...اترد لهلها
ما تفز اجروحي...نايم اسمك بيها
اشقد جبيرة الدنية...و انت مو شاريها
انت أكبر منها...و أكثر ايقدرونك
و الله لو ما تحجي انته الكلام اتذبحه سكته...ما نسمعه
و الضمير ايموت ذله و الشرف يبجي اعله بخته...دمعه دمعه
لا أخو اليفزع لأخيه لا غيور اليكفل اخته...ما كو فزعه
علمتنه الفارس...موقفه بميدانه
و البحر من يضحك...يخرع السّفانه
و انت بحرك هايج...كلهم ايخافونك
علمتني الماي ميت من تموت إقباله وردة...عطشتني
علمتني الموت صاحب بس يحب ايعيش وحده...حذرتني
و اليموت و سيفه بيده يكبر بعين اليضده...علمتني
و اليعيش ابحيله...ينتهي ابلا حيله
من طباع الشامت...ينتظر تشكيله
انت حته بموتك...خافوا ايحملونك
