قومن بنات النبي...خيطن خيمجن عبي
هاي الزلم ما تظل...باجر وراجن سبي
يالله استعدن لباجر هالليلة كلش قصيرة
باجر زلمنه تهاجر كلمن يروح المصيره
انسن دلال الهواشم انسن صفات الأميرة
كل وحده تلزم طفلها تلزم أسيرة بأسيرة
و بسرعة كون المشي...احنه و نختشي
لا يبقه عندجن أمل...باجر وراجن سبي
من هسه خلي نفكر لمن تصير المسية
ليلى تحامي رقية و آني عليَّ البقية
من الشمر يعتنيلي لا لا تطيحن عليه
خلن وحدي السياطه لمن يقطع إيديه
باجر سياط الهضم...خل تنزل اعله العظم
خلي أبشر الكفل...باجر وراجن سبي
ما ظل وكت يالحراير باجر تسافر زلمنه
باجر غطانه سحابة ناتج مداخن خيمنه
صيرن درع يا خواتي و آنا أشيلن علمنه
احنه ثكالة و أرامل بالغربة من يحترمنه
نصبغ وجهنه بدمه...حته العدو انوهمه
كل شي صفه محتمل...باجر وراجن سبي
لا لا تلفظن أسامي خاف العدو يكتشفنه
يبقه يسب الغوالي يعرفها نقطة ضعفنه
كل غالي باجر نتركه ما كو أهم من شرفنه
و اللي يطمئنه باجر كلش قريبة نجفنه
باجر حرب تستمر...بين الخدر و الشمر
واقع صبح مو مثل...باجر وراجن سبي
شوفن وجوه الغوالي ساعة و احفظن علايم
يختلف باجر شكلهم لمن تطيح العمايم
جثة تطيح اعله جثة تلتم جسوم الهواشم
رمله اويه ليله يحيرن منهو علي و منهو جاسم
كل الجثث تنسحق...تتقطع و تفترق
انسن عتاب الأهل...باجر وراجن سبي
مهد الطفل خل نبعده شوفوا له خيمة بعيدة
رمله بعد لا تهلهل شمع العرس ما نريده
لمن تشوفن كفيلي لحد تباوع لـ إيده
و ابن أمي باجر نشوف سيف اليمزق وريده
خل ننتظر رقبته...وكت الظهر ذبحته
ودعنه بس بالعجل...باجر وراجن سبي
من هسه صيرن سبايه و آنا الحرس و الكفيلة
أتعلم اعله الحراسة ما ظل وكت هية ليله
ما نشتكي من ألمنه من يسمع و نشتكيله
أدري علينه صعوبة قصة سفرنه طويلة
باجر زند ينبتر...باجر ظهر ينكسر
عالشاطي يوقع جبل...باجر وراجن سبي
لو وحدة باجر ولوها لازم تخف بمشيها
خلها تنادي يزينب اعليه تأشر بيديها
حته يعرفني و يجيني بلكت بعد ما يجيها
اختك يراعي الكفالة كلها تدور عليها
يا ويلي وكت الظهر...يرجع لي خالي المهر
أعرف أخويه انجتل...باجر وراجن سبي
