ألإمام زين العابدين عليه السلام
«شيعتي»
(گعده)
مسموم الگلب وإنهدم حيلي...من طف كربله إتگطع دليلي
يالباقر تراني...وافتني المنيه
* * *
علت للسجاد ونّه إبحالة إحضار المنيه
مثل ونّة گلب زينب من إصواب الغاضريه
إيجود وإعالج إبروحه إو عينه للباقر إربيه
وإينادي يوليدي إنتهت...إو هاي المنايه إتجدمت
إو روحي بوريدي إتعلگت...إو هاك إخذ مني التحيه
بالإسلام نفذلي وصيتي...وإعلگ بالصبر مصباح بيتي
وإتصور بيانـي...وافتني المنيه
* * *
هاك إخذ مني قواعد دينك إو شرعه إو نظامه
إو يمتزج نور الرساله إبنورك ونور ألإمامه
إو هاي من جدك محمد لعد ذريته كرامه
إبتقسيم ألأرزاق إنقسم...إلنه السياده عالأمم
باللوح سجلها القلم...من المبدأ للقيامه
وإنته إيكـون تتسلم أمرها...وإتگوم إبمصاعبها إو خطرها
مثـّل لي كياني...وافتني المنيه
* * *
يبني وإعلم بالسياده بيها مجهود إو مصايب
عاك إخذ شحم البعيني شوفه يبني إشلون ذايب
إو خلي گلبك مثل گلبي إيصير مركز للنوايب
والدهر ميعف لو وله...يوم الولاني إبكربله
إو گيـد إمتوني إبسلسله...وإجرعت مر المصايب
إبچبدي الجامعه إو سلسله إبمتني...وإچعوب الرماح الوسمتني
إو حاربني زمانـي...وافتني المنيه
* * *
يولدي صبر دليلك بعد أُصيك إبوصيه
من تشاهد جسم عاري إو سابح إبدم الحميه
إذكر إجروح الحسين التعد ألف إو تسع ميه
إو لو شفت جثـه إمگطعه...إبحد السيوف إموزعه
إذكر ألأكبر مصرعه...إو صيح آ يالغاضريه
يبني إو لو شفت بالعرس حنه...إذكر جاسم البلدم تحنه
من دهري الجفاني...وافتني المنيه
* * *
لون يالباقر إتريد إمصاب المأثر عليه
والحمس چبدي إو مردني إو ركز النشاب بيه
إنظر إبحكمة الباري عين محبوبه إونبيه
وإسا تشاهد كربله...إو سهم النفــذ من حرمله
للطفل عطشـان إچتله...إو فجع گلب الفاطميه
طلـَّع سهم المخيط وريـده...إو لـَمْ حسين دم الطفل بيده
وإمصابه دهاني...وافتني المنيه
* * *
إو بعد أبينلك مصيبه إتضيّگ إعليك الوسيعه
من تشاهد نهر جاري أحني ظهرك عالشريعه
وإذكر العباس عمك وإذكر إچفوفه الگطيعه
وإذكر ودايع فاطمه...إو شوف إشعمل بيها الضمه
إو شوف الحسين إمخيمه...إو ضيعة أهله إشلون ضيعه
لا تنسه الفواطم من سبوها...إو حبل البيه زينب چتفوها
صك عيني إو عماني...وافنتي المنيه
* * *
يولدي هذا الوداع إو بالشهاده النوب أخبرك
أسس إو عمّر إبعلمك وإصرف إعله الدين عمرك
إستشهدت بالسم تراني إو مثل أمري إيصير أمرك
تنچتل بالسم يا نفل...إو عالروس مثلي تنحمل
بس الگظو بالطـف چتل...شوف بيها إشعمل دهرك
بس الجثث والـروس إگطعوها...وإبدم الشهاده غسلوها
إو مصرعهم سبانـي...وافتني المنيه
* * *
