وصية ومأساة
«شيعتي»
(گعده)
من سهم اليسر والغاضريه...يالباقر طحت وإصوابي بيه
مصيوب مصيوب الگلب بسهام مصيوب
* * *
إو چني بالسجاد لايج مسهر إو مينام ليله
والمرض نحل إعظامه إو كربله الهدمت حيله
وأهجس السم إبدليلي مثل ما يگطع دليله
وينادي يالباقر گضت...دنياي والساعه دنت
إو بالسم چبدتي إتگطعت...إو جسمي لفـراگك نحيله
يبني إو صابته إسهام المنيه...إو سجلي إبدمـع عينك وصيه
(وهذا العلي مكتوب)
مصيوب مصيوب الگلب بسهام مصيوب
* * *
إو چني بالباقر يجود إبمهجته إو يجذب الحسره
إو طاح عالسجاد محني إو وضع صدره فوگ صدره
والتهم علم ألإلهي وإستلم للدين أمره
وافاه من عوده العلم...وتملك إبلبه الحلم
إو گام إبأمر دينه يهم...صابر أو لله صبره
إمن السجاد للباقر هديه...من نسج الرساله ألأحمديه
فصّله الشرف ثوب
مصيوب مصيوب الگلب بسهام مصيوب
* * *
إبحالة ألإحضار چان إيجود وينازع إبروحه
من اليسر مصيوب گلبه إو كثرت إبچبدته إجروحه
ورده من دمعة إعيونه ويتغذه بكثر نوحه
ما يهجع إو لا يستچن...مفجوع دلاله إو يحن
إو لا برح عن گلبه الحزن...إو يبس من إبچاه موحه
وسهـام النوايب ما خطنه...صابنه إو دليله وزعنه
إو دمع العين مسچوب
مصيوب مصيوب الگلب بسهام مصيوب
* * *
إو چني بالسجاد ناده يبني لا ينخطف لونك
وإحتسب بألله وإصبر والصبر ينعم إعيونك
وإحذر إسهام الشماته إو خاف مثلي إيصوبونك
دگعد وبينلك هظم...إو شوف إشكثر حامل سگم
گلبي إو تصدع بالظلم...وأحتسب بألله عونك
يبني إو علتي إبگلبي خفيـه...إو شوف إبكربله إشسادي عليه
إو خايف گلبك إيذوب
مصيوب مصيوب الگلب بسهام مصيوب
* * *
عله إفراش الولم چان إبكربله جسمي رهينه
يبني وسهام النوايب بالرمي ثگلت علينه
إو شاهدت حتى الرضيع إبحضن جدك ذابحينه
إو عالشاطي من طاح العلم...فرهود صاحو بالخيم
وإبخيمتي إتصيح الحرم...حرگو إخيمنه علينه
إو عالغبره مچاتيـل الهواشم...إو بيّه إتحيرت يبني الفواطم
إو منها الگلب مرعوب
مصيوب مصيوب الگلب بسهام مصيوب
* * *
لو ردت يبني تشاهد ما لگت روحي إو صبرها
فوگ نار الخيم حملت نار عماتك يسرها
إو نار من طبت الكوفه إبگلبي وإبگلبك جمرها
والجـامعه إبجيدي إلتوت...والسلسله إبمتني إحفرت
إبگلبي وإبگلبك أثرت...إو فيض دمعك من أثرها
والنحل إعظـامي إو جمَّد العين... ضرب الخيزران إبشفت الحسين
إو ريت الكون مگلوب
مصيوب مصيوب الگلب بسهام مصيوب
* * *
يا إولدي إو كل هالمصايب گلبي إو گلبك حملها
والنوايب لو تـِمـِّلك وصي گلبك لا يملها
إحفظ إحفظ هالوصيه وللصبر مرآة خلها
بإسم العـداله والعدل...ثبت إجدامك لا تزل
هاك إخذ ميراث الرسل...إو عگبك إنطيها لهلها
سنه من نبيّك عگب عينـاك...تگوم إبهالأمر وتخاصم إعداك
إو سابعهم المحجوب
مصيوب مصيوب الگلب بسهام مصيوب
* * *
