روحي إخلصت ودعوني...سهم اليسر بعيونـي
من كربله إو ذبحتـها...والزينب إو غربتها
سهم اليسر بعيوني
* * *
روحـي إخلصت وإتفطر گلبي إو ثجيله إهمومي...وإتگطع إبسبّاحه
إو حرگ المخيم يسعر يبس إبجسمي إدموعي...إو مسلوبه مني الراحه
سهم المثلث أثـر وإحرمني لذة نومي...وإبشفرته الجراحه
إو ظليت إعالج روحي...من علتي وإجروحي
من حربته إو شفرتها...والزينب إو غربتها
سهم اليسر بعيوني
* * *
أصفن وأحاچي گلبي يالگلب لا تمرمر...خليني تغمض عيني
ناداني يشهد ربي صوبني سهم ألأكبر...إوما أهجع إمخليني
حالاتي حـالة مسبي أنحب وأحن وأتحسر...سبي الحرم سابيني
يا گلبي گتله إتحمل...وإمن الدهر وإتأمل
روحي إودنت ساعتها...والزينب إو غربتها
سهم اليسر بعيوني
* * *
من شفت أبويـه إمگنطر والشمر گاطع نحره...والسيف شفته إبنحري
إبدم الوريد إمعفّر والخيل سحگت صدره...وأهجس السحگه إبصدري
دمعي إو دمـاه إتبادر وإمن الصواب المجره...إو هانت إجروحي إبصبري
فاضت يبويه إدموعي...إو لسا بعدها إضلوعي
ما تنعدل حنيتها...والزينب إو غربتها
سهم اليسر بعيوني
* * *
إشسوه الزمان إويايه صكني إو هدم مبنايه...إو هجمت عليّه إجنوده
والعلگمي جف مايه إو نار العطش بحشايه...إو گطع العمي إزنوده
راواني راعـي الرايه مرمي عالمسنّايه...إو عينه إبسهم ممروده
أحّـا يسهم الصابه...وأهجس إبعيني إصوابه
إو عيني إنطفت شمعتها...والزينب إو غربتها
سهم اليسر بعيوني
* * *
إو شاهدت بالطف لوعه غرزت إبگلبي الونّه...وإتفرست دلالي
جاسم إرماح إشموعه إبدم الشهاده إمحنه...والصابني چتالي
شفت الحرم مفجوعه إبـدم رگبته تتحنه...إو دمع المدامع هالي
هيچي عرس ما شفته...بالغاضريـه إعرفته
من زفـّته حنتها...والزينب إو غربتها
سهم اليسر بعيوني
* * *
إو شفت الرضيع الظامي وإبحضن ابوه إمّدد...من العطش وأهواله
إو شاهدت نحره الدامي مصيوب سهـم إمحدد...من حرمله إو چتاله
هانت عليّه إسهامي إو گلبي عليه إتمرد...إو كلسا أصير إبحاله
ما أدري شيطلبونه...عطشـان وإيذبحونه
إلما حاسبت ذمتها...والزينب إو غربتها
سهم اليسر بعيوني
* * *
إبذبحة هلي فجعوني وكلسا سـهم يرميني...والجمره تلذع جمره
من كربله مشـوني والسلسله بمتوني...إو للشام صار المسره
إبهالحال ما خلوني بالسم غـدر چتلوني...آ يا لزمان إو غدره
إو گلبي صبر ما يهتم...لا بالچتل لا بالسم
آ يا الحـرم سبيتها...والزينب إو غربتها
سهم اليسر بعيوني
* * *