زين العابدين
«فائزي مذيل»
(لطم)
بالسم گظه السجاد وإنمرد دلاله
والشـام آه الشام...صاب العليل إسهام
وإنمرد دلاله
* * *
صابته إسهام النايبه وظلت تچيده...روحـه إبوريده
واليسر خله الجامعه تحفر إبجيده...روحه إبوريده
من صارم ألأزدي الشرگ هامة عضيده...روحه إبوريده
ومصاب ألأكبر صاب چبدته إو چتاله
ظل عالشباب إينوح...يجرح الروح إبروح
وإنمرد دلاله
* * *
مرمي عله إفراش الولم والچبد عطب...جسمـه إيتگلب
إو فوگ الولم نار الضمه إبدلاله تلهب...جسمه إيتگلب
وسهم الرضيع إتركّز إبگلبه إو تصوب...جسمه إيتگلب
عالطفل روحه إتلوج والعين هماله
وسهم الطفل جراح...وإيگطع السباح
وإنمرد دلاله
* * *
چان العليل إينازع إبحجر المنيه...بالغاضريه
ومن سمع رمله إتنادي يبني إنگطع بيّه...بالغاضريه
وجمر الولم شال وجذب ونّه خفيه...بالغاضريه
وإنصرع للعريس وألأجل يبراله
أحّـا يجاسم صاح...صفگ الراح إبراح
وإنمرد دلاله
* * *
گلب العليل إشما يوّن يعلن ونينه...وألله إنسبينه
وإنهدم حيله من سمع صرخة إسكينه...وألله إنسبينه
طاح الچفيل إو رايته إو طاحت يمينه...وألله إنسبينه
مصرع گمر عدنـان صابه إو دهش حاله
إو صـاح إعله زينب صار...وكت النهب والنار
وإنمرد دلاله
* * *
عالقبله بفراش الولم چان إيتهدد...گلبه إيتمرد
كلسا يموت ويحتيي بألله إيتشاهد...گلبه إيتمرد
ولن شاهد إبنحر الطفل سهم المحدد...گلبه إيتمرد
صاح اليريد الماي خل يگطع آماله
ما ظل رحم بالگوم...مات الطفل محروم
وإنمرد دلاله
* * *
مالوم گلبه والولم نحل إعظامه...وحن عاليتامه
للخيم من رد المهر يسحب الجامه...وحن عاليتامه
والسرج مال إعله المهر والدم علامه...وحن عاليتامه
حسّب إحسـاب الشام وإبسبيت إعياله
صاح إعله زينب وين...يا عمه طاح حسين
وإنمرد دلاله
* * *
إو مجلس الكوفه الما حمل كل گلب همّه...هـذا اليهمه
وإتركز إبچبده الحمل راس أبو اليمه...هذا اليهمه
وجمرة الشام الحرگته ويبست دمه...هذا اليهمه
والحرم يمه إتـلوع من عصي الجماله
وسهم الشماته الصاب...گلبي إو غده عطّاب
وإنمرد دلاله
* * *
