ألإمام زين العابدين عليه السلام
«ميمر مذيل»
(لطم)
صبرك يبو البـاقر تعظّم شانه...بالغاضريه
سبحان رب الصبرك سبحانه...بالغاضريه
* * *
صبرك يو الباقر عظيم ومشكور...عنـد ألله صبرك
وإكسرت گلبك كربله وظل مكسور...ألله يجبرك
من شفت ألأكبر غرتته تسطع نور...نايم إبكترك
إطبر ومسحوگ إبرمگ عدوانه...بالغاضريه
* * *
صبرك يبو الباقر مرد دلالك...آثر الونه
وإصواب عملة كربله چتالك...ما تبره منه
تنسه الشباب المددوه إگبالك...بالدم تحنه
عريس والگوم إحرگو صيوانه...بالغاضريه
* * *
صبرك يبو الباقر جميل وممدوح...ألله يعينك
صوبت گلبك كربله وظل مجروح...وإتهمـل عينك
من رد أبوك وجاب أخيّك مجروح...هيّج ونينك
والسهم بأوداج الطفل نيشانه...بالغاضريه
* * *
صبرك يبو الباقر صبر ما سادي...مـو صبر آيه
إشصبَّرك من زينب لفت وتنادي...طاحت الرايه
كتلو چفيل إمخدرات الهادي...تاهت الثايه
وحدر الفواطم هدمو بنيانه...بالغاضريه
* * *
صبرك يبو الباقر جمرته الچتلك...ظلت مجيمه
إشصبَّرك من زينب لفت تَـَچـَّتلك...روحك سجيمه
لمن كتر من خيمتك رفعت لك...صحـت الظليمه
ذبحو حسين ورمّلو نسوانه...بالغاضريه
* * *
صبرك يبو الباقر شهد بيه الكون...حكمة إمامه
ما تجزع ويمك هلك ينذبحون...وألله إشكرامه
إشصبّر دليلك من إجاك الميم...ون يسحب إلجـامه
والسرج مگلوب ويجر بعنانه...بالغاضريه
* * *
صبرك يبو الباقر إراده وأسرار...معنا خفيه
إشصبّرك من شبو بالخيام النار...گوم آل أميه
نار ونهب وسياط من ألأشرار...بالفاطميه
وسبي الفواطم معوله رضعانه...بالغاضريه
* * *
صبرك يبو الباقر ثجيل وچتال...فطر دليلك
والحرم كل ساعه تغيرلك حال...من تشتچيلك
ومن دارو إمتون اليتامه بحبال...هدمو حيلك
وجسمك تضاعف وإنطوت أركانه...بالغاضريه
* * *
صبرك يبو الباقر الغير لونك...روحك مردها
ذبحو هلك هالگوم شيطلبونك...نـالت گصدها
جامعه إبجيدك سلسله بمتونك...يحفر زردها
إمصابك فجع أرض إو سمه وسكانه...بالغاضريه
* * *
صبرك يبو الباقر حياة الهالدين...لاچن فجعنه
والدين لو شافك تهل دمع العين...تجري دمعته
إحملت الهضم واليسر من عگب حسين...والسم جرعتـه
جمر البگلبك وجرت نيرانه...بالغاضريه
* * *
