اشبيدي على عمري الضاع...حسرة و مدامع و اوداع
صمت الحجر نطّقته
ظليت أطق راح براح...جم غالي ودعني و راح
تل الصبر شيبّته
ليل الهجر ما بيه صبح...كل غالي يترك لي جرح
يا مكثر اجروح الأحبهم
كل ذكره منهم جارحة...حته الحزن مني استحه
ضاع العمر دمعة ابدربهم
راحوا هلي و كل صبحتي...و الوالد و كل إخوتي
حيف القبر عني حجبهم
بالله اعله مهلك يتراب...ضميت اشقد أحباب
هرش القلب قطعتّه
قطعتّه من السباح...جم غالي ودعني و راح
تل الصبر شيبته
من مثلي يا عالم صُبر...شفت الأمَر من الأمَر
آنا العليل الضيعوني
وي طيحت الأكبر طحت...آنا انكسر ظهري صحت
و بشمعة القاسم جووني
شفت الطفل لمن رجع...و بحضن أبوه نحره انقطع
قبل الطفل ريت اذبحوني
بيَّ ألف آه و آه...وضع الطفل ما أنساه
طير و يرفرف شفته
بس بمماتي أرتاح...جم غالي ودعني و راح
تل الصبر شيبّته
آنا الوقعت اعله النهر...قلبي قبل جدمي عثر
و اجفوف أبو فاضل شفتهن
كل واحد القيته ابكتر...و أشعر ينادني العذر
ظهري انكسر من قبّلتهن
من ودعت راعي العلم...من عينه طلعت السهم
ابدمعي جروحه غسّلتهن
اقعد يعباس و شوف...حال العليل المجتوف
برض الغرب ضيعّته
يا عمي مكسور اجناح...جم غالي ودعني و راح
تل الصبر شيبّته
شفت الأبو حاير يصد...سهم المثلث بالجبد
عاينته من ظهره يطلعه
ضامي وقع بآخر نفس...و بصدره بن جوشن رفس
ناوي عله نحره يقطعه
ثنّه اعله صدره ركبته...من القفه حز رقبته
زينب اجت يمه تودعه
شافت رمح شايل راس...ركضت تحشم عباس
خل يقعد يشوف أخته
بالله انتظر يا ذبّاح...جم غالي ودعني و راح
تل الصبر شيبّته
و اخيول أمية اتجمعت...داست على صدره و مشت
كسرت عظم صدره اسمعتها
جثة أبوية امقطعه...فوق الرمال اموزعه
يوم الدفن قوة اجمعتها
مره أدور خنصره...و الميمنة و الميسرة
كل المصايب بيه شفتها
ما بيه عظم ما مكسور...عاري و طريح و منحور
ابهذا الوضع ودعته
حته الصبر مل و صاح...جم غالي ودعني و راح
تل الصبر شيبّته
قدامي عماتي انسبن...يمي خواتي اتسلبن
انرعبن و طاحن عليه
آنا بجراحي اتحزمت...أتوجه عالعصّه قمت
عن الحرم أشقف بيديه
أنهض و أطيح من الألم...و آنا أنظر ادموع الحرم
يا ويلي من دمعة رقية
صاح الشمر زينب وين...خل تنظر الراس حسين
فوق الرمح علّقته
ضاع الصبر و المفتاح...جم غالي ودعني و راح
تل الصبر شيبّته
زينب إجت يمي تون...من جابوا انياق الحزن
قالت تعال اركب يعمه
قلت إلها لو آنا اركبت...منهو اليركبج ناشدت
صدت عله الكافل تحشمه
حان العتب يا با الفضل...زينب أسيرة اعله الهزل
زحمه اعله زينب و الله زحمه
ترضه يعباس بهاي...صار الشمر يمشي وياي
طول الدرب رافقته
فوق الهزل بس أرواح...جم غالي ودعني و راح
تل الصبر شيبّته
