حين الغايب ايعود...نبني قبرك اردود

ويه المهدي ننصب مأتمك برض المدينه

أمل يالمجتبه و رجوه عدنه و ندري ميخيب

باجر من يجي الغايب جرح كل مؤمن ايطيب

تشرق عالبشر شمسه شمس الباطل اتغيب

تشوف الناس يومه ابعيد و احنه انشوفه اقريب

لو طّول قدومه...أبقه امتاني يومه

يوسف دهره من جُب غيبته لابد يجينه

ثارك عايش بباله عن اعيونه ما غاب

حين اليوصل القبرك يخّضر تحته التراب

يجيك بمرهم ادموعه يطيب بيك الصواب

يجر اسهام من نعشك يداوي جبدك الذاب

اينادي و دمعه مسجوم...يا عمي يمسموم

ينحب و بحسرته يصفج ايساره بيمينه

حقيقة هذي أنظرها مو من نسج الأوهام

لابد باجر الغايب يحقق كل الأحلام

عقب طول السفر يرجع ناشر سود الأعلام

صوغه بإيده جايبلك حنة عرس جسام

جايب عينه دمعه...شايل بيده شمعه

اهناك الدنيه كلها تضوي من غرة جبينه

مشهد قبرك المظلم عن المهدي ما فات

قبور العترة مهدومة اشتظن ينساها هيهات

البقيع أجداده من يوصل يرد يبني المزارات

قبب أربع يعّليها ويه اثمن منارات

و من يفتح مُضيفه...بالروضة الشريفه

تقصده الوادم و كلمن تهل بالفرحه عينه

رغما قبرك اتهدم بقه بالعالي ذكرك

منهو القدرك ايمسه و الله امعلي قدرك

طموح بجيّت المهدي أمل عدنه و نخبرك

مثل قبر الرضه بمشهد نريد ايصير قبرك

و اتزوره الملايين...مثل زوار الحسين

بين المجتبه تسعي و قبر أمه الحزينه

قسم من ينفتح دربك قسم يالمجتبه اتشوف

نجيلك كلنه مشّايه طبع الشيعة معروف

إذا نزحف لبو الأكبر البقيعك نعتني ازحوف

إذا طفنه اعله بو فاضل على قبرك نجي انطوف

حلم اللي انتظرته...يمته انعيشه يمته

نقصد مرقدك و ننادي زوار اعتنينه

ويه المنتظر باجر من نوصل الحضره

مواكب بإسمك اتعزي تواسي النبي بقبره

نذكر سيدي امصابك ننوح و نجري عبره

ننصب منبر و يصعد الإمام المهدي يقره

انشوفه اعله المنابر...ينعه و راسه حاسر

يون لمصيبتك و يذَوب الكون بونينه