آنا الصراط الحيدري...يالظلمتوني
و آنا الحبيب الكوثري...ما رحمتوني
حته ابدفنتي...سالت دمعتي
فتّحت عيني عله أنغام الرزيه...فاتحة حزني فقد سيد البريه
آنا شفته من انكسر ضلع الزجيه...و آنا بيدي غسّلت حامي الحميه
هاي الدواهي من الزغر...شبت راسي
ون الزجيه امن الكسر...جارح إحساسي
أول دنيتي...سالت دمعتي
اي و حق رب المشارق و المغارب...آنا شفت الأعجب و شفت العجايب
دمعة المحروم من شوف الحبايب...حسرة المخذول من ايخذله صاحب
بين النوايب و المحن...وحدي خلوني
وشقد صحت آنا الحسن...ما يسمعوني
رادوا نكبتي...سالت دمعتي
بايعوني و راحوا الغيري و عصوني...حيروا حامي الدخيل و حيروني
من نويت اعله الحرب ما أيدوني...من نويت اعله الصلح شو حاربوني
تركوا كتاب الله و مشوا...ما يعرفوني
و بحكم إبن هنده رضوا...و آني عافوني
و آني بغربتي...سالت دمعتي
اجرعت كاس المنيه وي حسرتي...دمعة حسين التقطع لي مهجتي
و آنا قدام الطشت و أنزف جبدتي...خويه شيل الطشت خاف اتشوفه اختي
هاي الأميرة الآمره...ريحه من أمنه
من تبجي تهضم حيدره...و احنه تهضمنه
طالت نظرتي...سالت دمعتي
ها يزينب يختي شو قلبج تفطر...اشلون لو شفتي ابطشت راس أبو الأكبر
و انتي مسبيه و شمر يمج تبتخر...آه يزينب يوم سبيج يوم الأقشر
إلمن تشبحين النظر...و انتي مجتوفه
و الكافل ابشاطي النهر...ظلت اجفوفه
آه يا حسرتي...سالت دمعتي
اجنازتي كل الهواشم شّيعوها...بس ولد هنده بسهام استقبلوها
جرّد العباس سيفه من رموها...لا يعباس الجنازة رجعوها
سيفك يبو فاضل تره...نعرف اعلومه
بالطف يسبع القنطره...ننتظر يومه
أنظر لخوتي...سالت دمعتي
آنا ظلموني و بعد جهلوا وقاري...رادوا الأحباب ما تندل مزاري
آنا أخويه الظل ثلثتيام عاري...و آنا وي دمع العقيلة دمعي جاري
آنا اذبحوني من القفه...يم أبو اليمه
و آنا جراحي نازفة...دمي وي دمه
قطعوا رقبتي...سالت دمعتي
آنا كل سوط الضرب زينب ضربني...و السلب سكنه و رقيه هم سلبني
روحي بالطف يم أخوتي و جاسم إبني...انحب اعله حسين و إلطم يالتحبني
لمن أصد للعلقمي...مدمعي يجري
يم الغيور الهاشمي...ينكسر ظهري
أذكر خوتي...سالت دمعتي
