خطبة الزهرة استمعها...بيها تشرح لك وضعها
سرها ظاهر...للضماير...خطبة الزهرة استمعها
دخلت المسجد بت محمد و اتشوف...هالناس كلها اصطفت اصفوف اصفوف
بضعة الهادي اتكلمت عالمكشوف...و ابتدت تخطب و الدمع صار احروف
هالخطبة تامر بالعدل و المعروف...و أهل الضغينة صارت اتحس بخوف
تخطب و تحجي بدمعها...اويه الغصب حقها و منعها
سرها ظاهر...للضماير...خطبة الزهرة استمعها
صاحت الزهرة و الدمع صار إلسان...نحمد الباري اللي خلق هالأكوان
و أنعم علينه بالفضل و الإيمان...و أجعلنه حجة واضحة الكل إنسان
خصص محبتنه بنصوص القرآن...و إلنه مواقع بالعرش و الميزان
و السماء اللي رفعها...بينه كونها و صنعها
سرها ظاهر...للضماير...خطبة الزهرة استمعها
يا ناس آنا فاطمه اتعرفوني...بضعة محمد و العدل مضموني
اتهضمون ابوية النبي من اتهضموني...و الباري يغضب لمن اتآذوني
ليش اغتصبتوا احقوقي و اظلمتوني...و فجرتوا طوفان الدمع بعيوني
يا هو للأمة خدعها...منهو غيّر مجتمعها
سرها ظاهر...للضماير...خطبة الزهرة استمعها
هالصوت يالوادم توجه إلكم...جان الجهل آخركم و أولكم
رب الجلالة ابوالدي أنقذكم...و أجعلكم أمة و عالأمم فضلكم
يا ناس شنهو الحصل وشبدلكم...شتجاوبون الهادي من يسألكم
منهو للزهرة فجعها...و يا سبب هشموا ضلعها
سرها ظاهر...للضماير...خطبة الزهرة استمعها
يا ناس جنتو بطرف حفرة من النار...أنقذكم الباري بأبوية المختار
بثقل النبوة انصركم اعله الكفار...و بجهده عنكم دفع كل الأخطار
بهمته و همة ابن عمه الكرار...و الكل خطر يرسل علي حامي الجار
رايته بجفه طبعها...و الشدد عنكم دفعها
سرها ظاهر...للضماير...خطبة الزهرة استمعها
آنا الوديعة و جرحي للسا ما طاب...آمالي ضاعت بيكم و ظني خاب
بسما أبوية المصطفه عنكم غاب...بسرعة انقلبتوا يا وسف عل الأعقاب
اشراح أنسه محسن من وقع خلف الباب...لو أنسه ضلعي بدفعة الباب انصاب
قلبي جم غصة جرعها...من بشر تركت شرعها
سرها ظاهر...للضماير...خطبة الزهرة استمعها
