حزن و اهموم يا حيدر...حزن و اهموم

مصيوبة تدريني...و اصوابي ماذيني

حزن و اهموم يا حيدر...حزن و اهموم

آنا الجليلة الطاهرة تعرف جلالة قدري...مو سهلة تصبر يا علي و عينك تشاهد كسري

لاجنها حكمة و اقتضت و الأمر لازم يجري...بهاي المصيبة الراتبة و تنختم صفحة عمري

حكم مرسوم يا حيدر...حكم مرسوم

و صبرك يواسيني...و اصوابي ماذيني

حزن و اهموم يا حيدر...حزن و اهموم

يا أسد غالب لا تظن روحي الحزينة اتلومك...و اهموم حزني ما ردت تنضاف فوق اهمومك

و لا أريد أقلك يا علي يوم الملازم يومك...شاعت بكل الواسعة عزمك و صيت اعلومك

جزاك اللوم يا حيدر...جزاك اللوم

هالمحنة تكفيني...و اصوابي ماذيني

حزن و اهموم يا حيدر...حزن و اهموم

هالدنية كلها يا علي جانت تلوذ بسدك...لو ما وصية والدي ما وصل واحد حدك

و لا جان خصمك يعتني الدارك و يهضم جبدك...و لا جان للبيعة غصب تنوخذ و اتمد يدك

أمر محتوم يا حيدر...أمر محتوم

حزنك يباريني...و اصوابي ماذيني

حزن و اهموم يا حيدر...حزن و اهموم

يا حيدر و كسر الضلع اصوابه بدليلك أثر...و اشلون أعتب يا علي و من حزني حزنك أكثر

ابعين الإمامة شاهدت باب النبوة التسعر...شيصير دلالك جبل لو جبل هم يتفسر

دمع و ادموم يا حيدر...دمع و ادموم

تتنازف بعيني...و اصوابي ماذيني

حزن و اهموم يا حيدر...حزن و اهموم

من عيني تنزف يا علي عبراتك و عبراتي...و بقلبك أدري اتجمعن لوعاتك و لوعاتي

ما ريد منك تستمع يا بالحسن حسراتي...خليني آنا و دنيتي أتباصر بشوغاتي

وداع اليوم يا حيدر...وداع اليوم

منهو اليداويني...و اصوابي ماذيني

حزن و اهموم يا حيدر...حزن و اهموم

أنهض و أطيح بلوعتي و أتسند بأحزاني...عن عيني كلها اتباعدت بس الصبر خاواني

عقبك أخذ بيدي الدهر و اعله الهضم دلاني...قلبي التهب و ىنا بصبر أخمد لهب نيراني

جمر مضروم يا حيدر...جمر مضروم

يمشي بشراييني...و اصوابي ماذيني

حزن و اهموم يا حيدر...حزن و اهموم