يا ليل اسمع ونيني...نهارك لا يجيني
جرح باجر...كسر خاطر...نهارك لا يجيني
يليلي انظر جروحي و جمرة المدمع...بعد طول يليلي و لا فجر يطلع
المثل حيدر يليلي طعبة يتودع...بعد شصبر يليلي الراح ما يرجع
صحت و الله هضيمة...إذا زينب يتيمه
يالمسافر...كسر خاطر...نهارك لا يجيني
تعال انظر يليلي الدمعت أحبابك...إجت هاي اليتامه ووقفت ببابك
يبوية تصيح كلها و تبجي لمصابك...صعب يا ليل فقد الوالي و اغيابك
الأبو خيمة يا ليلي...عله افراقه يويلي
دمع ناظر...كسر خاطر...نهارك لا يجيني
إذا دمعة العمر هالليلة أبجيها...وداعاً يا علي ما أقدر أحجيها
تميل امن الحزن زينب يواليها...إذا غاب الأبو وين اليحاميها
علي يكتب وصيته...لمن قربت منيته
قلب شاجر...كسر خاطر...نهارك لا يجيني
غيابك يا علي ما يوم حسبته...دخله ايروح كلشي و لا تروح انته
يا من رمضان ويه العيد يتمته...يموت الموت ليش الموت طاوعته
فلا تمشي السفينة...إذا غايب علينه
فكر حاير...كسر خاطر...نهارك لا يجيني
اليتيم ايريد ايدك من يها العيد...يحيدر و اليتامه اتشوف بس الإيد
أبد ما ريد غيرك يا علي ما ريد...بعد حيدر يليلي هالعمر شيفيد
تعال اسأل علينه...تروح و من يجينه
بلا ناصر...كسر خاطر...نهارك لا يجيني
دخيلك يا علي و هيهات ما عوفك...أنا اعيوني اشيفيدن إذا ما أشوفك
حلم كل اليتامه بنظرة اجفوفك...إجينه و شمتك تستقبل اضيوفك
إلك مدّينه ايدينه...يتامه و اعتنينه
أظل صابر...كسر خاطر...نهارك لا يجيني
بعد طول يليلي لو بعد ساعة...الحبيب اويه الحبيب ايطول اوداعه
أبونه هذا أبونه و نعرف أطباعه...نريد انشوف جرحه و نعرف أوضاعه
