يمك نزل يبن الحسن و ينادي جبريل...الله يعظم أجرك بحماي الدخيل

جبريل من سابع سمه بونة و نياحه...للمهدي نازل و الدمه يصب من جناحه
يقله علي الهاليوم تتنازف جراحه...لليوم يالمهدي الدمه من هامته ايسيل

لليوم تنزف هامته و تتفايض إدماه...لليوم تصرخ شيعته و تصيح ويلاه
لنه العلاج بصارمك يا حجة الله...و السيف بس السيف هوه اليشفي الغليل

بس سيفك اللي يداوي القلوب الحزينة...لو تسمع الكرار شينادي بونينه
جدك علي بمحرابه يصرخ ثاري وينه...و الثار بقه ينتظره جيلٍ بعد جيل

جيلٍ بعد جيل و تمر اسنين و أعوام...و احنه بعدنه بكل زمان انعيش أيتام
ندري بظهورك كل جرح من عدنه يلتام...و بنور وجهك يا بو صالح ينجلي الليل

ينجلي الليل و تنكشف نجمات الأكدار...و بنار غيظك حين تظهر تطفي جم نار
عجّل ادركنه سيدي حكم الزمن جار...و انت التعدل جفته لو رادت اتميل

لو مالت الجفة تعدلها بيمينك...إلحق عله دينك قبل ليموت دينك
انت الأسد و الشيعة يالمهدي بعرينك...تحرسها و تحاميها من كل نايبة وويل