آنا آسف...يا من تسألوني عن حالة أبوكم

آنا آسف...لو قلت بالطبرة راح ايتموكم

آه من دگت على بابي المصيبة...علي گالوا هامته بدمه خضيبة

اشلون من هوه دوه العلة تصيبه...و اللي جنت آنا أسأله أصبح طبيبه

الكوفة ركضه...جنها يا هاشم قيامة و باغتوكم

الكوفة ركضه...للصراط المستقيم الناس إجوكم

من وصلت الدار حمّاي الحمية...شفت جن محشر يتامة اتحيط بية

هذا يلزم ثوبي ذاك ايبوس ايديه...و آنا أقلهم راح أدي اللي عليه

راح أحاول...يشفه من جنتوا بعياله ينسبوكم

راح أحاول...يرجع ايوزع الخبر لو جوعوكم

الحسن أدخلني و شفت دمعة بعيونه...قاعد بزاوية حسين ايصبرونه

علي شفته امدد و منخطف لونه...ما فحصته و يسألوني اشلون أبونه

أمهلوني...يالبجوكم حته من ايصبروكم

أمهلوني...و اندعوا بأمن يجيب يالبجوكم

اشما أعاين و أفحص الطبرة اعله هامه...الحجي واحد بلغ بن ملجم مرامه

وصلت الأم راسه من هشمت عظامه...و للأسف جان العدو امسمم حسامه

أدري بيكم...أكثر أجركم إذا أذكر عدوكم

أدري بيكم...قبل هاي الطبّرة ردتوا ايطّبروكم

بعيني كلمة لاجن إلساني تردد...ايموت حتماً حته لو هالطبرة تضمد

بس إذا عدكم مدامع من محمد...اشوية خلوا اعله الجرح و بسرعة ينشد

الدنية فرگة...و الأعز منكم عليكم فارقوكم

الدنية فرگة...اتهيؤا الوقفة عزاء الوادعوكم

حالته ما أخفي عنكم حالة صعبة...يوم يومين و بعدها ايلاگي ربه

شبعوا شوف و خل يودعونه الأحبة...انجان عنده أبنية خل اتسلي قلبه

ممكن أسأل...عن اثنين الناس بيهم يحسدوكم

ممكن أسأل...وين اختكم زينب و عباس أخوكم

هذا تشخيصي و أگلكم خطر أمره...زينب بعباس خلوها تحضره

بإسم ثالث يهمس و قوه يذكره...اشتقرب إلكم كربله ما عندي فكره

صرت أسمعه...بكربله ايگول و جيوش ايسلبوكم

صرت أسمعه...يهمس ايگول اعذروني لو سبوكم