يا علي لاحت علامات الفجر...و الوعد ينتظرك بفارغ صبر

تسجد الفرض الصبح...ينزف براسك جرح...علي

يا علي صوت المؤذن كبّر و حان الوعد...صلي فرض الحق يحيدر و اسجد الواحد أحد

عاهدت و الصادق انت الما خلف يوم العهد...يا علي الله و رسوله بفضلك و حقك شهد

بالدعاء اتقضي ليلك من يجن...تارك الدنيه و ضميرك مطمئن

و للفخر أعظم صرح...ينزف براسك جرح...علي

انت من يوم الولادة عندك بأمرك علم...عايش بحلم التلاقي و تنتظر وعد الحلم

طلعت اوياك الكواكب و بمصيرك محتزم...شاءت القدرة بصلاتك باقي عمرك ينختم

و السماء اتنادي يا خير العمل...هذا وحي الله اعله محرابك نزل

ياخذ الدم اليسح...ينزف براسك جرح...علي

خاشع لله بسجودك و القدر حل موعده...انشلت ايمين المرادي سيفه لمن جرّده

بالغدر جازه حنانك يا علي اعليك اعتده...و الوحي يبجي و ينادي انهدمت أركان الهده

أحمر الليلة انقلب لون السمه...و انسفك فوق الأرض أطهر دمه

صابك الخان الملح...ينزف براسك جرح...علي

ريتك اتشوف اليتامه من وصل ليها الخبر...هذا يا بوية ينادي و ذاك لجذامه اتعثر

واحد الواحد يقله ريته ينجه من الخطر...يا علي و يم باب دارك بيهم الخوف استقر

و الطبيب ابدمعة اعيونه اكتفه...يعني جرحك ماله طيبه و لا شفه

وسفه يالقلبك سمح...ينزف براسك جرح...علي

لو دواك انعرفه عدنه نركض الدارك سوه...كل محب قلبه اعله جفه الجرحك ايقدمه دوه

يا علي و بجالك احنه نشتم براحه الهوه...تظلم اعلينه بحزنها الدنيه التودع الضوه

و البجي اعله امصيبتك ما ينقطع...و اليتيم اشيمتلك غير الدمع

و الزمن منه اشيصح...ينزف براسك جرح...علي

راسك العالي بشموخه أعله من جرح الزمن...حامي جارك يبقه طبعك و الصبور الممتحن

شيعتك ندري بولائك يا علي غالي الثمن...عينك اتشوف الضحايه الوصلتك يا بالحسن

و التوابيت اعله بابك كل وكت...عذرك اينادي المحب لو قصرت

فدوه دونك ننذبح...ينزف براسك جرح...علي

يا علي اليدري بمحلك ما كو غيرك من يحل...قلي يا خوف اليغيره و عن درب حبك يزل

مستعد لجلك يضحي حته البلمهده طفل...شيعتك احنه اعله حبك لا نساوم لا نذل

وبرجال الغيرة تنزل كربله...قافلة برايتها تتبع قافلة

لا تنازل لا صلح...ينزف براسك جرح...علي

احنه تربيت الذبيح الدمه عالسيف انتصر...و الكتب أروع عبارة للوفه ابدم النحر

و أصبحت للعزة آية و خالدة بطول الدهر...و بعزم كل شيعي نشمي تلقه عباس القمر

بعده خالد موقف حسين الأبي...خلي يسمع كل وهابي و ناصبي

يا علي رمز المدح...ينزف براسك جرح...علي