لا تبجين عمه بداعت الغالي...رقية بدمعج الموت ايتراوالي
آيات هذا الدمع...آيات ما تنسمع
هزيتي العرش بالدمع ما تدرين...و تبجي أملاك ربج كلها من تبجين
كون أدري الدموع اترجع الميتين...لبجي ابدم لمن ما يرجع الوالي
يعمه اشلون أعوفه و جنت ما أعوفه...و أشوف الموت كون بيوم ما أشوفه
أبويي الجان يمسح راسي بجفوفه...و لا خله الهوه ايمس طارف اذيالي
أحلفج باليبس فوق النحر دمه...و عليج بداعت العباس يا عمه
لا تبجين خاف ادموعج اتلجمه...من اتطيح فوق المنحر اتلالي
اشلون أنسه الضوه الما فارق اعيوني...عزيزة قلبه لو رادوا يسموني
يزعل لو سمع بيهم يزعلوني...أبويه الجان بيده ايحجب اخيالي
و حق دمعج رقية العلنحر تسبيح...روحي اتطيح وي دمعاتج من اتطيح
عن راسي يزينب صوت ابوج ايصيح...شيلي الماي شلتها بيوم عن بالي
أبويه البلحوافر داسوا اضلوعه...و عليه شربت الماي أصبح ممنوعة
اشلون أنسه اليصيح و نزلت ادموعه...يا عباس جيب الماي لطفالي
لا تبجين عمه بداعت اعيوني...جرح انتي و أخافن بيه يلجموني
ما ريد العده بموتج يشوفوني...مكسورة و خيال اجفاج يبرالي
و حق الكفل خدرج الا أموت اوياه...ما دام الدمع ما بيه نفع مبجاه
اشلون أدخل البيته و بعد ما ألقاه...اشلون أرجع و من ضواه خالي
