خاطري الليلة انكسر...ادموعي صلّت عالنحر
و إنكسر قلب الحجر...يا علي
يا عمر جبته أرّبي اتحملت أشجانه...يبن ريحانة محمد يا علي الريحانة
جنت أشمك بيك تروه ارويحتي العطشانه...ليش يا زهرة حياتي زهرتك ذبلانه
الله لا ينطي الدهر...اشنذبك و صاير وذر
قلبي صاحك و انفطر...يا علي
قلبي محراب المصيبة و النوايح فرضه...يالرحت جفني بغيابك بالدموع اتوضه
يا علي وداعت شبابك ما نسيتك لحظه...هم سمعت بقلب مره ينسه دقت نبضه
نحرك الينزف نهر...تعبي ينزف و السهر
رد لي رجع لي النظر...يا علي
أمك و أمك هضمها يالحبيب امصابك...اتروح مني بهالسهولة ما حسبت احسابك
آنا و أهلي انروح فدوه يا علي لترابك...آه لو تدري يغالي اشقد جرحني اغيابك
أزرع و تالي الثمر...ينخطف بيد القدر
زمزم اعيوني انفجر...يا علي
يا نبي إحساسي دخيلك لا تيتم إحساسي...من المهد حبك يغالي اتخالط بأنفاسي
بيضت وجهي ييُّمه انت رفعت راسي...بس ييُّمه قلبي بعدك بالهموم ايقاسي
يا شبه سيد البشر...طيفك بعيني صور
وحشة ليلي ابلا قمر...يا علي
أحجي وي نحرك ييُّمه و دمعتي دم اتهلي...ليش عاف الموت أمك و انت ما عافك علي
يمه لا تحسبني آنا امعارضة لأمر العلي...أهل ما عندي ييُّمه و انت يوليدي هلي
يا ضوه انجوم السحر...نحرك الغالي اعتذر
و آنا صحت من الخطر...يا علي
حسبي الله ما لي غيره هوه أدره بحالي...كلمة صعبة بس قلتها و انمرد دلالي
وداعة الله وداعة الله يا علي يالغالي...من عقب عينك ييُّمه لن شمر يبرالي
حضروا نوق السفر...بالسبي عندك خبر
خيّم بروحي الكدر...يا علي
