يبوية راح أموت من القهر...يبوية ما رجع منك خبر
ها يبوية آني حميدة بوية لا تنساني...اختنق قلبي بغيابك و الهضم بجّاني
سيف هجرك ما رحمني يذبح بوجداني...بس تطول الفرقة أكثر بالقبر تلقاني
يبوية من رحت راح النظر...يبوية ما رجع منك خبر
و الله مشتاقة أشوفك بوية وينك وينك...بس تعال أنطيك عيني فدوه عيني العينك
راح أموت اشوكت ترجع يا سفير حسينك...لا تظن آنا و دليلي لا تظن ناسينك
يبوية يذبح بروحي الدهر...يبوية ما رجع منك خبر
ها يبوية ارجع و اخذني مهجتي مجمورة...ليش يا بوية عفتني ابلا أبو مقهورة
أرد أروح اوياك حته صيتي ياخذ دوره...ليش بس أولاد مسلم و آنا ما مذكورة
يبوية ذبّل اعيوني السهر...يبوية ما رجع منك خبر
ما إجتني أخبار منك راح أموت ابقهري...و الله ما أدري أتاني لش وكت ما أدري
خايفة بس لا يبوية هيجي يخلص عمري...قمت أنام اعله الترايب قمت أنام بقبري
يبوية دمعتي مثل المطر...يبوية ما رجع منك خبر
ها يبوية اشلون رايح ما ترد للتالي...ما دريت انمرد جبدي و انمرد دلالي
انتظرتك و انتظرتك بوية حس بحالي...محد ايعوض مكانك ظل مكانك خالي
يبوية فقدك ايذوب الصخر...يبوية ما رجع منك خبر
