عله اخدودي شجاها ادموعي همّاله...شهر عاشور قالوا بيّن اهلاله
عاشور هل اهلاله...مأجور لستقباله
صحت لا هله ابجيتك عسن لا هليت...عساها برمد عيني و ليك ما صديت
غير النايحة بدار الوحي اشخليت...بجّيت الرسول المصطفه و آله
يا شهر المصايب و اللطم و النوح...اهلالك لمن انشوفه ابسمانه يلوح
يهيج كل مدامعنه عله المذبوح...يخبرنه اشجره اعله حسين و اعياله
يالشهرك اهلاله ابكل سنه امن ايهل...كل ابيوتنه بيها المناحة اتحل
وحّدها الدموع اعله الوجن تنزل...و اعلينه السواد ايلوق تفصاله
نذب لون البياض و نلبس الأسود...يالجمرة مصابك بينه ما تبرد
و اليوم الحشر يحسين تتوقد...و المكسور قلبه النوح يحلاله
يبو اليمه وحق ضلع أمك المكسور...علينه من نشوفه ايهل شهر عاشور
ابكل شريان دمنه يا ذبيح ايفور...هذا اليفدي دمه و ذاك أمواله
ابكل مجلس إلك خدام مجتمعه...بين الشاعر و بين الذي ينعه
و بين الينطي ماي بحسره و دمعه...ما بين المحّزم و العزم شاله
شيقدمون يحسين اليخدمونك...يالسلبوا اثيابك ما يجازونك
و جم خادم صبح يحسين مجنونك...مثل عابس ابحبك ينوصف حاله
