عالعرش نشروا رداءه...يا رقية هناك
الله ينصب له عزاءه...و تلطم الأملاك
نقره بعيون السمه...يا شبيهة فاطمه
بخيالي طفلتين أقره حجيهن...تعب فرقة و سهر بيّن عليهن
و عله اتراب الحزن فرشن عبيهن...العليلة وي رقية أسمع بجيهن
اليلتفت لمن يسافر...ما يرد معناه
باجر الله اليدري باجر...حته موتي أنخاه
دمعتي نزلت دمه...يا شبيهة فاطمه
رقية اوياي اقعدي و خل نباوع...بمعاني اسمه نشوف الشمل ضايع
السمه ترسم طفل ضامي و ينازع...و أبويه بيمنته أربع أصابع
منحر و خنصر أشاهد...ينرسم مسلوب
و الحجي يا إختي واحد...يحصل المكتوب
ياكل بروحي الضمه...يا شبيهة فاطمه
القمر مخسوف أشوفه و تبجي عينه...شبيهه يقول مقطوعة يمينه
الشمس تسأل قمرنه وينه وينه...تره النجمات ضاعت من إيدينه
عن يتامة چنها تسأل...و الشمس زينب
كلشي بيها ابصعدت التل...من تون شيّب
هذا واقع نفهمه...يا شبيهة فاطمه
الكواكب عالأرض نشروا ضياهم...أفتهم تفسيرها و شنهو وراهم
علي و جسام يا موت الخذاهم...الورد و الياس نشتم من دماهم
جاسم اتزفه اعله راية...و ارتفع هالصوت
شمعه ما شعلوا عباية...عرسه عرس الموت
تطفي ناري المضرمه...يا شبيهة فاطمه
أخيراً بالسمه طبعت حوافر...اسألت جبريل قلي شنو صاير
يقول اتسحق خيل حسين باجر...و خواتج تحترق مغرب العاشر
الما يحرقه هالمخيم...حافر ابصدره
عالحرم تنزل جهنم...و جنة عالغبره
و العيال ابلا حمه...يا شبيهة فاطمه
أشاهد بالسمه صوره عجيبة...تموتين انتي بالشام و غريبة
تحسبين اعله راسه شيبة شيبه...و كل شيبه بألف حسره و مصيبة
المختصر قبل النهاية...واضح و مضمون
چن أشاهدهم سبايه...لمن يرجعون
هية هاي الخاتمه...يا شبيهة فاطمه
