ياللي تنشد ليش تجري اعيوني...اقيود جفي اتجاوبك و امتوني
آنا يا هالناس زين العابدين...آنا جدي المرتضه ووالدي حسين
يالتنشدوني اشسبب تهمل العين...روحوا نشدوا امتوني لتنشدوني
هذا متني الدامي يشرح قصتي...من سلاسل جفي تعرف محنتي
ياللي تنشد ليش هلت دمعتي...انشد الناس الذي هضموني
ياللي رايد تستمع مني الخبر...روح إقصد كربله و شاهد صور
تنظر ابعينك تقطع جم نحر...امجانهم أتمنه لو نحروني
آنا حفنه اسهام صوبني الزمن...آنا قلبي صار مركز للمحن
لا قرابة و أهل لا دار ووطن...ابوالدي و كل إخوتي فجعوني
لا تنشدوني يهل الناس اشجره...عفت كل أهلي و عمامي امجزرة
آنا ابن الذي قطعوا منحره...و ريتكم و بكربله اتشوفوني
شفت عمي من وقع عالمشرعة...و الجفوف اويه الزنود امقطعه
ضاقت بعيناي و الله الواسعة...و من دمه لو أبجي لتلوموني
شفت بعيوني شبيه المصطفه...اشلون من طاح و بدر عمره اختفه
صاح أبويه حسين عالدنيه العفه...وذر من بعده العده وذروني
شفت عريس الهواشم عالتراب...و شاهدت من بعده جم محنة و عذاب
التغسلت بدماها كل ذيج الشباب...ووحدي ما بين الحرم خلوني
شفت أخويه الطفل عبدالله الرضيع...بالسهم نحره صبح دامي و قطيع
شنهو ذنب الطفل عالغبرة صريع...اشجان عدكم خبر متخبروني
اعيوني يا هالناس شتشاهد بعد...شفت أبوية حسين طايح و الأشد
الشمر شفته فوق صدره من صعد...قبل ذبحه ريتهم ذبحوني
و بعد جتله حرقوا اعلينه الخيم...و باليسر أخذوني وي هاي الحرم
ركن صبري و حيلي يا ناس انهدم...حين بحبال الصبر قيدوني
