علي يا من قلعت الباب...باب القبر متقلعه
اقلعه و اقصد الزينب...عليها الناس مجتمعه
علي يا حاضر الشدات زينب وقعت بشده
و هاي امخدرتكم ليش عليها الشمر يتعده
أخوها حسين عالتربان و عباس انقطع زنده
ظلت بين هذا وذاك...صدت للنجف تنخاك
روح وسيفك بيمناك
يصقار الزلم يا حيد...هذي ساعة الفزعه
يصقار الزلم للطف اقصد زينب الحره
شوف اوليدك العطشان منهو اللي قطع نحره
يحيدر قوم رد الخيل خيل الداست ابصدره
زينب يا علي ابيا حال...عدها أطفال عدها اعيال
تريدك يا علي خيّال
إجاها الشمر بيده السوط...أريد بجفك اتصفعه
إجاها الشمر بيده السوط يتمرجل عليها ايريد
و أبو فاضل بلايه اجفوف شعاتب و العتب شيفيد
تصفق إيد فوق الايد زينب يا علي شتريد
تريدك بيدك الفقار...و تحضرها و تطفي النار
وينك ها يحامي الجار
و زينب يمك و تنخاك...و اعرفك صوتها اتسمعه
يا حامي الجار زينب هاي ليش الشمر سلبّها
هذاك ايشتم الزهره و ذاك بسوطه عذبها
ثارات ببدر و حنين حان اليوم مطلبها
و كلها التمت عليها...غريبه و طاح واليها
يحيدر الحق اعليها
تره اليضرب متنها بسوط...محد غيرك ايمنعه
محد غيرك ايمنعه يبو الحسنين اقصدها
هاي الخيل و الجيمان محد غيرك ايردها
تره زينب وحيده اليوم غيرك يا علي اشعدها
يم حسين هسه اتلوع...باوع خنصره المقطوع
و راسه اعله الرمح مرفوع
تنادي يا بني هاشم...بس الراح شيرجعه
